Eýrokomıssııa basshysy EO-nyń AQSh tarıfterine qatysty sharalaryn jarııalady

ASTANA. KAZINFORM — Donald Tramp 2 sáýirdi Amerıkany «Azat etý kúni» dep jarııalap, barlyq elge qarsy jappaı saýda tarıfterin engizý kúni etip belgiledi, dep habarlaıdy Euronews.

Eýrokomıssııa basshysy Ýrsýla fon der Lıaıen mundaı saıasat eshkimniń múddesine saı kelmeıtinin málimdedi.

Eýroodaqtyń qolynda Donald Tramptyń Amerıkanyń barlyq saýda seriktesine jappaı tarıfter engizý josparyn kelissózder júrgizý, ustaý jáne qajet bolǵan jaǵdaıda «artqa ıterý» úshin paıdalana alatyn «kóp kartalary» bar, dep atap ótti Ýrsýla fon der Lıaıen.

AQSh-tyń barlyq saýda seriktesine áser etetin jańa tarıf paketi qazirdiń ózinde bolat, alıýmınıı jáne avtomobılderge 25 paıyzdyq baj salyǵy engizilgen EO-da alańdaýshylyq týdyryp otyr.

Eýropalyq komıssııa olarǵa qarsy sharalardy usyndy, biraq olardy engizýdi sáýir aıynyń ortasyna deıin qaldyrdy. 

Brıýssel janjaldy beıbit jolmen sheshýdi talap etip otyr, biraq onyń jaýap retindegi qadamdarynda «qyzyl syzyqtar» bolmaıtynyn eskertti. 

Fon der Lıaıenniń aıtýynsha, tarıfter qarapaıym tutynýshylar úshin baǵanyń kóterilýine ákeledi, jumys oryndaryna qaýip tóndiredi, kedende «bıýrokratııalyq qubyjyq» jasaıdy jáne óz taýarlaryn Eýropaǵa eksporttaıtyn amerıkalyq kompanııalar úshin «sumdyqqa» aınalady. 

Ol sondaı-aq tarıfter Tramptyń Amerıkany qaıta ındýstrııalandyrý týraly kóp aıtylǵan kún tártibine qaıshy keledi dep boljady.

— Bul teketires eshkimniń múddesine saı emes, — dedi ol.

Óz sózinde fon der Lıaıen komıssııanyń maqsaty Atlant muhıtynyń eki jaǵalaýy arasyndaǵy jappaı saýda soǵysynyń aldyn alý úshin «kelissózder arqyly sheshim» bolatynyn aıtty.

— Biz bul kelissózderge kúsh pozıtsııasynan kelemiz. Eýropa óz qolynda kóptegen karta ustap otyr: saýdadan tehnologııaǵa jáne bizdiń naryqtyń kólemine deıin, — dep atap ótti EO atqarýshy bıliginiń basshysy.

Ol qosyp ótkendeı, eger kelissóz ymyraǵa ákelmese, Brıýssel barlyq nusqalary bar «qatań qarsy sharalar» qabyldaýdan tartynbaıdy.

EO taýarlarǵa bajben ǵana emes, qyzmetterge de shekteýlermen jaýap bere alady. 2023 jyly EO-da AQSh-pen taýar saýdasynda (156,6 mlrd eýro) profıtsıtke jáne qyzmetterde (108,6 mlrd eýro) tapshylyq boldy.

Fon der Lıaıen shıelenisýdi boldyrmaý úshin kelissóz júrgizýge shaqyrdy, biraq sonymen birge EO kóshbasshylarymen ortaq áreketti úılestirip otyr. Alaıda elder óz ekonomıkalaryna zııan keltirýden qorqyp, ortaq pikirge kele almaı otyr.

Buǵan deıin EO Tramp tarıfteri saldarynan 13,1 mlrd eýro shyǵynǵa ushyraýy múmkin ekenin jazǵan bolatynbyz.