Eýrokomıssııa 2035 jylǵa qaraı jańa kólikterge qoıylatyn ekologııalyq talaptardy jumsartpaq

ASTANA.KAZINFORM — Eýropalyq komıssııa seısenbi kúni 2035 jyldan bastap benzın jáne dızel otynymen júretin jańa kólikterdi satýǵa tyıym salý talabyn jumsartýdy josparlap otyrǵanyn málimdedi. Onyń ornyna avtokólik óndirýshilerine shyǵaryndy gazdardy 90 paıyzǵa qysqartý jóninde maqsatty kórsetkish qoıylady, dep jazdy Sınhýa.

Qalǵan 10 paıyzdyq shyǵaryndylar Eýroodaq aýmaǵynda óndirilgen tómen kómirtekti bolatty paıdalaný, sondaı-aq elektrootyn men bıootyn qoldaný arqyly ótelmek.

Eýrokomıssııa usynǵan «avtokólik paketi» aıasynda 2035 jyldan keıin de avtokólik óndirýshilerine tolyqtaı elektrli emes keıbir modelderdi satýǵa ruqsat beriledi. Olardyń qatarynda qosylatyn gıbrıdter (plug-in hybrid), júris qory ulǵaıtylǵan kólikter jáne jeńil gıbrıdter bar. Bul modelder tolyq elektrli jáne sýtekpen júretin kóliktermen qatar naryqta qala beredi.

Bul ózgeris 2023 jyly qabyldanǵan EO erejelerin qaıta qaraýdy bildiredi. Atalǵan erejeler 2035 jyldan bastap jańa jeńil kólikter men shaǵyn avtobýstar úshin kómirqyshqyl gazy shyǵaryndylaryn 100 paıyzǵa qysqartýdy talap etken edi.

Eýrokomıssııanyń habarlaýynsha, 2035 jylǵa deıin avtokólik óndirýshilerine EO elderinde óndiriletin shaǵyn ári qoljetimdi elektr kólikteri úshin «sýperkredıtterdi» paıdalaný múmkindigi beriledi. Bul qadam yqsham elektr kólikteriniń óndirisin jedeldetýge baǵyttalǵan.

Eske sala keteıik, bqǵan deıin EO arzan taýarlar ımportyna qosymsha alym engizetinin jazdyq.