Eýrokomıssar F.Hogan EO pen QR-nyń agrarlyq-azyq-túlik salasyndaǵy yntymaqtastyq perspektıvalaryn joǵary baǵalady
ASTANA. QazAqparat - Úkimet úıinde QR Premer-Mınıstriniń birinshi orynbasary Baqytjan Saǵyntaev aýyl sharýashylyǵy máseleleri jónindegi Eýropalyq komıssar Fıl Hoganmen kezdesý ótkizdi. Bul týraly primeminister.kz habarlady.
Taraptar QR-EO jelisi boıynsha ózara is-qımyldyń jaǵdaıy men perspektıvalaryna qatysty, onyń ishinde 2015 jyldyń 21 jeltoqsanynda qol qoıǵan keńeıtilgen seriktestik pen yntymaqtastyq týraly Kelisim sheńberindegi máselelerdiń keń aýqymyn talqylady.
Premer-Mınıstrdiń birinshi orynbasary aıtyp ótkendeı, Eýropalyq Odaq qazaqstandyq syrtqy saıasattyń mańyzdy vektorlarynyń biri jáne saýda-ekonomıkalyq ózara is-qımyldyń basymdyqty baǵyty bolyp tabylady.
Baqytjan Saǵyntaev keńeıtilgen seriktestik pen yntymaqtastyq týraly qol qoıylǵan Kelisim Qazaqstan men EO arasyndaǵy saıası, ekonomıkalyq jáne mádenı baılanystardy jan-jaqty damytýǵa myqty negiz bolýdy kózdeıtinin basa aıtty.
Qujat ekijaqty ózara is-árekettegi, onyń ishinde agrarlyq-azyq-túlik salasyndaǵy, aýyl sharýashylyǵyn damytýdaǵy, azyq-túlik qaýipsizdigi salasyndaǵy ózekti syn-tegeýrinderdi sheshýde jańa múmkindikter ashady.
Óz kezeginde Fıl Hogan aýyl sharýashylyǵy salasyndaǵy yntymaqtastyqtyń keń perspektıvalaryn atap ótip, QR jáne EO arasyndaǵy dıalogty damytý dınamıkasyn joǵary baǵalady. Eýropalyq Komıssar sondaı-aq keńeıtilgen seriktestik jáne yntymaqtastyq týraly Kelisim saýda-ınvestıtsııalyq baǵyttaǵy ózara is-qımyldy odan ári nyǵaıtatynyna senim bildirdi.
Kezdesý qorytyndysy boıynsha taraptar aýyl sharýashylyǵy, AÓK-tegi birlesken ınvestıtsııalyq jobalardy júzege asyrý salasyndaǵy máseleler keshenin konstrýktıvti talqylaýdy jalǵastyrýǵa nıet bildirdi.
