Eýrokodtardy engizý qurylys salasyn tehnıkalyq retteý júıesine júrgiziletin reformalardyń negizi - S. Nokın
ASTANA. Qyrkúıektiń 8-i. QazAqparat /Ernur Aqanbaı/ - Qazaqstannyń jaǵdaılaryna beıimdelgen eýropalyq kodtardy engizý jáne eýropalyq standarttarǵa kezeń-kezeńmen kóshý qurylys salasyn tehnıkalyq retteý júıesine júrgiziletin reformalardyń negizi bolyp tabylady.
Bul týraly búgin Úkimet otyrysynda Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın aıtty. «2010 jyly 58 bólimnen turatyn barlyq 10 eýropalyq kodtar aýdarylyp, olardy qoldaný jóninde nusqaýlyqtar ázirlenedi. Sondaı-aq, «Normalaý jónindegi Eýropalyq uıymmen» bekitilgen eýropalyq kodtardy satyp alý jáne olardy qoldaný boıynsha barlyq mindetti protsedýralar saqtalatyn bolady. Bul jaǵdaı Qazaqstannyń qurylys salasynda shetel ınvestorlarynyń qyzmeti úshin tehnıkalyq kedergilerdi joıýǵa jáne 2011 jyldan bastap eýrokodtardy qoldanýǵa múmkindik beredi», dedi S. Nokın.
Onyń sózine qaraǵanda, ótpeli kezeńde qoldanystaǵy qazaqstandyq normatıvter eýrokodtarmen birge qatar paıdalanylady. Odan keıin, 2011-2012 jyldary eýrokodtardyń barlyq 58 bólimine ulttyq normalar men standarttarmen tolyqtyrylǵan (materıaldarǵa, jumystarǵa, synaqtarǵa arnalǵan) ulttyq qosymshalar, sondaı-aq jobalaýshylardyń anyqtamalary, basqarý qujattary jáne taǵy da basqalar ázirlenedi. Olar ázirlenip, qoldanysqa engizilgen saıyn eskirgen qazaqstandyq normatıvter joıylady. «Osy baǵytta, Qazaqstanǵa tán tabıǵı-klımattyq jaǵdaılarǵa baılanysty barlyq esepteýlerge ınjenerlik-tehnıkalyq zertteýlerdi muqııat júrgizý jumystarynyń aýqymdy kólemin oryndaý qajet. Sonymen qatar, keıbir zańnamalyq aktilerge jáne zańǵa táýeldi aktilerge qurylys salasynyń tehnıkalyq retteý máseleleri boıynsha ózgerister men tolyqtyrýlardyń jobalaryn ázirleý boıynsha jumystar júrgiziletin bolady», dedi Agenttik tóraǵasy.
