Eýrokeńestiń eks-basshysy Ulybrıtanııanyń Brexit-ten keıin ydyraýy múmkin ekenin joqqa shyǵarmady
ASTANA. QazAqparat - Eýropalyq keńestiń birinshi tóraǵasy Herman Van Rompeı Brexit boıynsha referendým qorytyndysyna baılanysty Ulybrıtanııanyń ydyraýy múmkin ekenin joqqa shyǵarmaıdy, dep habarlaıdy RIA Novostı.
Beısenbi kúni Ulybrıtanııada Eýroodaqtaǵy múshelikke qatysty referendým ótken. Resmı derekterge sáıkes brıtandyqtardyń 51,9% eldiń Eýroodaqtan shyǵýyn qoldap daýys bergen.
Van Rompeı Canvas telearnasyna bergen suhbatynda: "Bul Ulybrıtanııany ydyratýy múmkin. Ókinishti, sebebi men 15 jyldan beri eýropalyqpyn. Bul (Ulybrıtanııanyń EO-dan shyǵýy) Eýropalyq odaq úshin qorqynyshty emes, biraq mende áldeneni kesip alyp tastaǵandaı kúıde turmyn», - dedi.
Separatıstik baǵyttaǵy Shotlandııa men Soltústik Irlandııa Brexit-pen kelispeıtinderin birden baıqatty.
Shotlandııanyń birinshi mınıstri Nıkola Sterdjen referendým qorytyndysy boıynsha aımaqtyń EO-daǵy músheliktiń saqtalýyn qoldap daýys bergenin aıtty. Bunyń aldynda ol Brexit jaǵdaıynda Shotlandııanyń ulttyq partııasy aımaqtyń táýelsizdigine qatysty qaıta referendým ótkizetinin málimdegen edi. 2014 jylǵy daýys berýde daýys berýshilerdiń 55%-y Shotlandııanyń Ulybrıtanııa quramynda qalýyn qoldaǵan.
Óz kezeginde Soltústik Irlandııa ultshyldarynyń eń iri partııasy «Shınn Feın» aımaqtyń Irlandııamen birigýi týraly referendým ótkizýge nıetti ekenin jarııalady.
Foto: Aleks Maknoton
