Eýrodepýtattar Aýstrııa men Frantsııa mektepterindegi atys qurbandaryn eske aldy

ASTANA. KAZINFORM — Eýroparlamenttiń Strasbýrgtegi (Frantsııa) kóshpeli sessııasynyń birinshi kúni Eýroparlament depýtattary Aýstrııa men Frantsııada jaqynda mektep qabyrǵasynda bolǵan kisi óltirý qurbandaryn eske aldy, dep habarlaıdy Kazinform menshikti tilshisi. 

Eýroparlament tóraıymy Roberta Metsola seısenbi, 10 maýsymda Frantsııanyń Nojan qalasynda mektep oqýshysy muǵalimniń kómekshisin pyshaqtap óltirgen jáne Aýstrııanyń Grats qalasynda burynǵy oqýshy toǵyz stýdent pen muǵalimdi atyp óltirip, taǵy kóp adamdy jaraqattaǵan jan túrshigerlik oqıǵalarǵa qatty qaıǵyrǵanyn bildirdi. 

— Zorlyq-zombylyq pen óshpendilikke Eýropada jáne bizdiń mektepterde oryn joq, — dedi ol.

Ol «mektepter qorqynysh úshin emes, oqý men ósý úshin qaýipsiz keńistik bolyp qalýy kerek» dep qosty.

Prezıdent Roberta Metsola Frantsııa men Aýstrııa mektepterinde qaza tapqandardy eske alý úshin únsizdik mınýtyn jarııalady.

Sodan keıin eýrodepýtattar 16-19 maýsym aralyǵynda Strasbýrgte plenarlyq otyrysty ashyp, Shengen aımaǵynyń qurylǵanyna 40 jyl tolýyn atap ótti.