Eýrodepýtat Qazaqstanmen ǵarysh salasynda yntymaqtastyq ornatýdy usyndy
ASTANA. KAZINFORM — Sársenbi kúni Eýropa astanasynda «Orta dáliz jáne jahandyq qaqpalar» taqyrybyna arnalǵan Berlın eýrazııalyq klýbynyń (BEK) 44-jyldyq otyrysy ótti, dep habarlaıdy Kazinform agenttiginiń menshikti tilshisi.
Otyrysta Eýropa men Azııa arasyndaǵy kólik baılanysynyń jańa júıesin qalyptastyrýdaǵy Qazaqstannyń ósip kele jatqan róli talqylandy.
Іs-sharaǵa Qazaqstan men Eýropalyq odaqtyń memlekettik organdarynyń ókilderi, bıznes qaýymdastyqtar, sarapshylar, ǵylymı uıymdar, logıstıkalyq kompanııalar jáne qarjy ınstıtýttary qatysty.
Qazaqstannyń Germanııadaǵy elshisi Nurlan Onjanov óz sózinde Qazaqstannyń Eýropalyq odaqtyń jetkizý tizbekterindegi orny jyldan jylǵa nyǵaıyp kele jatqanyn atap ótti.
— Bul ýaqytsha úrdis emes, ekonomıkalyq áleýetimizdiń qarqyndy ósýine jáne qurlyqaralyq baılanysty qamtamasyz etetin ınfraqurylymnyń damýyna negizdelgen uzaqmerzimdi baǵyt. Biz Eýropalyq odaqpen jáne Germanııamen, ásirese kólik pen logıstıka salasynda seriktestikti nyǵaıtyp kelemiz, — dedi elshi.
Qazaqstannyń EO janyndaǵy turaqty ókili Roman Vasılenko bul sharanyń ekijaqty qatynastar tarıhyndaǵy mańyzdy kezeń — Qazaqstan men EO arasyndaǵy keńeıtilgen áriptestik jáne yntymaqtastyq týraly kelisimniń 10 jyldyǵy qarsańynda ótip jatqanyn alǵa tartty. Ol Eýropalyq odaqtyń Transkaspıı halyqaralyq kólik baǵytyn damytýǵa 20 mlrd eýro kóleminde qoldaý kórsetý nıetin aıtyp, EO ınstıtýttaryn Orta dálizdiń «tar jerlerin» joıýǵa baǵyttalǵan jobalardy is júzinde júzege asyrýǵa shaqyrdy.
Germanııa ekonomıkasynyń Shyǵys komıtetiniń atqarýshy dırektory Mıhael Harms óz sózinde Global Gateway bastamasy tek Qytaı men Eýropany baılanystyrý emes, sonymen birge Ortalyq Azııa, Kavkaz jáne Eýropalyq odaqty zamanaýı, turaqty kólik jáne tsıfrlyq dálizder arqyly biriktirý ekenin aıtty.
— Saýda damyǵanda, ınvestıtsııa da keledi. Senimdi logıstıka taýarlardyń naryqqa der kezinde jetkizilýin qamtamasyz etedi, bul óz kezeginde jańa óndiristik tizbekter men ónerkásiptik áriptestikterdiń qalyptasýyna múmkindik beredi. Al jumys istemeıtin kólik ınfraqurylymy jaǵdaıynda eń mańyzdy shıkizat kózderine qol jetkizýdiń ózi mánin joǵaltady, — dedi ol.
Kólik vıtse-mınıstri Jánibek Taıjanov kólik salasynyń damý baǵyttary boıynsha baıandama jasady.
Pikirtalas barysynda nemis jáne eýropalyq logıstıkalyq kompanııalardyń Qazaqstan aýmaǵyndaǵy qyzmetin keńeıtý josparlary, sondaı-aq ekijaqty yntymaqtastyqtyń túrli baǵyttary talqylandy.
Qatysýshylar kólik ınfraqurylymyn damytý, baǵyttardy ártaraptandyrý jáne ekologııalyq turaqty sheshimderge kóshý — Qazaqstan men Eýropalyq odaq arasyndaǵy seriktestiktiń basty baǵyttaryna aınalyp otyrǵanyn atap ótti.
Berlın eýrazııalyq klýbynyń otyrysy Qazaqstannyń Shyǵys pen Batysty baılanystyratyn jańa kólik júıesiniń mańyzdy bóligine aınalǵanyn taǵy bir márte kórsetti.
Іs-sharaǵa Germanııadan kelgen Eýroparlament depýtaty Sergeı Lagodınskıı de qatysty. Ol qazaqstandyq BAQ-qa bergen suhbatynda Eýropalyq odaq eýrazııalyq keńistikti qaıta asha bastaǵanyn aıtty.
— Geosaıası sebepterge baılanysty bizge Eýropada jańa odaqtastarmen yntymaq ornatý qajet. Bul rette Qazaqstan — aımaqtaǵy eń mańyzdy áriptesterdiń biri. Ol tek kólik dálizi bolǵandyqtan emes, óz aldyna yqpaldy derjava bolǵandyqtan da mańyzdy. EO-nyń Qazaqstandy Global Gateway sııaqty bastamalarǵa turaqty túrde tartýy — durys sheshim, — dedi ol.
Sonymen qatar eýrodepýtat Qazaqstan men EO yntymaqtastyǵynyń keleshekte jasyl energetıka, tsıfrlyq tehnologııalar jáne ǵarysh salasyn qamtýy múmkin ekenin atap ótti.
— Birinshiden, Qazaqstannyń klımattyq áleýeti zor, sondyqtan jasyl energetıka baǵyty tıimdi bolmaq. Ekinshiden, tsıfrlyq jobalar boıynsha da seriktestik kúsheıýi múmkin — biz Eýropada bul baǵytta zańnamalyq jáne ınvestıtsııalyq jumystar júrgizip jatyrmyz. Qazaqstanda da bilikti jas mamandar kóp, bul resýrsty birge paıdalanýymyz qajet. Úshinshiden, biz ǵarysh taqyrybyn da kóterýimiz kerek. Qazir EO-da ǵarysh tehnologııalary jónindegi zań daıyndalyp jatyr, bul salaǵa ınvestıtsııa artyp keledi. Munda Qazaqstan tarıhı turǵydan úlken ról atqara alady, — dedi Lagodınskıı.
Buǵan deıin Germanııadan saılanǵan Eýroparlament depýtaty Tomash Froılıh Kazinform agenttiginiń tilshisine suhbat berip, Qazaqstan men Eýropalyq odaq arasyndaǵy áriptestiktiń mańyzy, saıası reformalar men eldiń aımaqtyq róli týraly pikirin bildirdi.