Eýroazııalyq energetıkalyq korporatsııa № 5 energoblokty jańǵyrtýdy jalǵastyrýda
PAVLODAR. QazAqparat - Qaıta qalypqa keltirý jumystary stantsııanyń ónimdiligin 10 paıyzǵa jáne energoblok qyzmeti merzimin arttyrýǵa múmkindik beredi, dep habarlaıdy pavlodarnews.kz.
Jóndeý jumystary bastalǵan energoblokta Pavlodar oblysynyń ákimi Bolat Baqaýov boldy.
Korporatsııa ókilderiniń aıtýynsha, jańǵyrtýǵa deıin bloktyń qýattylyǵy 300 MVt bolsa, jańǵyrtýdan keıin 325 MVt-qa deıin artpaq. Jobanyń quny - 200 mıllıonnan astam dollar. - N5 energoblokty jańǵyrtý 2018 jyldyń ekinshi jartyjyldyǵyna josparlanǵan, - deıdi «EEK» AQ-nyń birinshi vıtse-prezıdenti Marat Búgibaev. - Budan bólek, jyl saıyn bar qýattylyqty ustap turý úshin jóndeý baǵdarlamasyn ótkizemiz. Byltyr bloktardyń birinde ortasha, basqasynda kúrdeli jóndeý júrgizildi".
2018 jyly birinshi toqsanda korporatsııanyń bir bólimshesi - «Shyǵys» kenishinde N2 aǵymdy-tsıkldi arshý kesheni engiziledi. Ótken jyldyń sońynda kúrdeli jóndeýden keıin kásiporynda N2 energoblok iske qosyldy. Jańartylǵan blokpen birge quramyna symsyz datchık, datchıkter monıtorıngi júıesi men dirildıagnostıka engizildi. 
Aqsý elektr stantsııasynyń energobloktaryndaǵy qaıta qalypqa keltirý jumystary 2001 jyldan bastap júzege asyrylady. Segiz bloktyń beseýi keshendi jańǵyrýdan ótti.
