Eýro-5 engizilgenimen Eýro-3 nemese 4 standarttarynyń avtokólikterin paıdalaný jalǵasady - sarapshy
ASTANA. QazAqparat - Qazaqstanda Eýro-5 engizilgen kezde, álemde budan da jetildirilgen ekologııalyq standarttar paıda bolady. Bul týraly QazAqparat tilshisine «Qazaqstan memlekettik-jekemenshik seriktestik ortalyǵy» AQ-nyń sarapshysy Nadıra Myrzaǵalıeva aıtty.
«Munaı óńdeý zaýyttarynda Eýro-3,4 jáne 5-ti kezeń-kezeńmen engizý uzaq ýaqytty talap etedi. Biz Eýro-5-ti engizgen kezde budan da jetildirilgen standarttar paıda bolady»,-deıdi N. Myrzaǵalıeva.
Atap aıtqanda, ekologııalyq standarttar avtokólikterde paıdalanylǵan gazdarda quralǵan zııandy zattardy retteıdi. Kólikterden shyǵatyn gazdar aýany lastaýdyń jalpy úlesinde 90 paıyzǵa jýyq kólemdi qamtyp otyr, ıaǵnı bunda 200-ge tarta hımııalyq qosyndylar bar.
Osy sebepten ekologııalyq standarttardyń jańa túrleri daıarlanýda. Bul óz kezeginde atalǵan gazdardyń adam densaýlyǵy men qorshaǵan ortaǵa áserin tómendetýge negizdelip otyr.
«Eýro-5- ti engizgenniń ózinde Eýro-2,3 nemese 4 standarttarynyń avtokólikterin paıdalaný jalǵasady. Sebebi, halyqtyń basym bóligi kólikterin birden jańasyna aýystyra almaıdy», - dedi sarapshy.
