Eýro-3, Eýro-4 standarttaryn birtindep qoldanatyn bolamyz - Á. Qusaıynov
ASTANA. Aqpannyń 19-y. QazAqparat /Rýslan Ǵabbasov/ - Eýro-3, Eýro-4 standarttaryn birtindep qoldanatyn bolamyz. Bul týraly búgin Astanada Elbasynyń Joldaýyn júzege asyrý mindetterine arnalǵan alqa májilisinde Ábilǵazy Qusaıynov málim etti,
dep habarlaıdy QazAqparat.
Kezeń-kezeńmen ekologııalyq Eýrostandarttary engiziletinin jetkizgen mınıstr, «ózderińiz bilesizde, bul úlken problema. Sońǵy jyldary ekologııalyq máselelerge erekshe nazar aýdarylýda. Almatyda búginde avtokólik sanynyń kóptigi qalanyń kólik tútininen gazdalýy kólemine áser etýde. Sondyqtan jumys eki baǵyt boıynsha júrgizilýde. Onyń ishinde eń bastysy Eýro-2 standartynyń oryndalýyn qamtamasyz etý»,-dedi.
Eski mashınalardy ákelýdiń qajeti joq ekenin eskertip ótken Á. Qusaıynov, «endi barlyq standarttarǵa saı basqa sanatqa kóshý kerek. Búginde bizdiń kórshiler men Eýropa elderi Eýro-3, Eýro-4-ke qol jetkizip otyr. Biz birtindep bul standarttardy qoldanatyn bolamyz»,-dedi.
