Euro-2024-tegi mańyzdy kezdesýde gol salǵanyma qýanyshtymyn- Abat Aıymbetov

ASTANA. QazAqparat - Fýtboldan 2024 jylǵy Eýropa chempıonatyna irikteý satysynyń tórtinshi týrynda Qazaqstan quramasynyń Soltústik Irlandııaǵa qarsy oıynynda jeńis golyn salǵan Abat Aıymbetov kezdesý jaıynda pikirin bildirdi, dep habarlaıdy QazAqparat tilshisi.

Kezdesý barysynda Abat Aıymbetov 88-mınýtta jasyl alańnyń ortasynan qarsylas quramanyń birneshe fýtbolshysyn aldap ótti. Qaqpashymen betpe-bet shyǵyp, jeńis golyn soǵyp ketti.

«Barsha jankúıerlerdi jeńisimen quttyqtaımyn. Árbirimizge jaqsy emotsııa syılady degen oıdamyn. Jeńiske jetkenimizge óte qýanyshtymyn. Sońǵy mınýtta úsh upaı oljalap ketýge múmkindik týdy. Quramamyz jaqsy oınady. Jeńis golyn soǵý - jalǵyz meniń eńbegim emes. Ulttyq qurama jeıdesin kıgen jigitterdiń barlyǵy bir otbasy sekildi. Biz oıynnyń qıyn bolatynyn aldyn ala bildik. Soǵan qaramastan qarsylasqa toıtarys berip, jeńis jolynda ter tógildi. Mundaı oıynda upaı oljalaý ońaı emes. Búkil Qazaq elin jeńispen quttyqtaımyn. Mańyzdy úsh upaımen elge oralý - biz úshin úlken mártebe.

Mańyzdy kezdesýde gol salý baqyty buıyrǵanyna qýanyshtymyn. Jalpy, oıynda ártúrli gol bolady. Negizinde ony ádemi gol nemese basqasha dep bólip qaraýǵa negiz joq. Sol sátte ózim qarsylastar qaqpasyn dál kózdeı alǵanymdy maqtan tutamyn. Bapker maǵan oıynǵa qatysty josparyn aıtqan edi. Josparymyz júzege asty. Ázirge qaıtalaý sátin kórgen joqpyn. Dese de barlyǵy ádemi gol salǵanymdy aıtyp maqtap jatyr», - dedi Abat Aıymbetov.

Shabýylshy ulttyq qurama jeıdesindegi 29 oıynda segizinshi golyn soqty. Buǵan deıin Ázerbaıjan men Belarýsti - 2, Birikken Arab ámirligi, Danııa, Lıtva quramalaryn bir márte qapy qaldyrdy.

Abat Aıymbetov 1995 jyly 7 tamyzda Qyzylorda oblysy Aral aýdanynda dúnıege kelgen. Qazirge deıin qazaqstandyq «Aqtóbe», «Qaırat», «Astana» klýbtarynda oıyn kórsetip keledi.