EURO-2024: Qazaqstan tuńǵysh ret Fınlıandııadan basym tústi

Fýtboldan 2024 jylǵy Eýropa chempıonatyna irikteý satysynda Qazaqstan quramasy segizinshi oıynyn Fınlıandııaǵa qarsy ótkizdi, dep habarlaıdy Kazinform.

Kezdesý barysynda quramalar alǵashqy mınýttan shabýylǵa kóshti. Ekeýine de jeńiske jetý óte mańyzdy bolatyn. Qorjynǵa úsh upaı salǵan qurama áli de qurlyqtyq doda fınaldyq satysyna beriletin joldamaǵa talasatyn quramalar qataryna qosylatyn edi.

Oıynnyń 28-mınýtynda fınlıandııalyq Robert Teılor esep ashyp ketti. Qazaqstandyq fýtbolshylar birinshi kezeńde tarazy basyn teńestirýge umtyldy. Degenmen tablodaǵy esepke ózgeris engen joq.

Ekinshi kezeńde de qos qurama alma-kezek shabýylǵa kóńil bóldi. Oıynnyń 76-mınýtynda fınlıandııalyq qorǵaýshylar óziniń aıyp alańynda qolmen oınap, tóreshiler penaltı belgiledi. Ony qazaqstandyq Baktıer Zaınýtdınov múltiksiz oryndap, tarazy basyn teńestirdi. Ol 90-mınýtta áýelep kelgen goldy qaqpaǵa engizdi. Osylaısha ulttyq qurama jeıdesindegi 14 golyn soǵyp, surmergender kóshin bastady. Nátıjesinde budan buryn 13 gol soqqan Rýslan Baltıevti artqa tastap ketti.

Osylaısha Qazaqstan qarsylasynan 2:1 esebimen basym tústi. Olar áli de Eýropa chempıonaty fınaldyq satysyna beriletin joldamaǵa talasatyn múmkindikke ıe bolyp otyr.

Aıta ketsek, eki qurama buǵan deıin resmı oıyndarda bes márte kezdesip, barlyǵynda fınlıandııalyq fýtbolshylar jeńiske jetken edi.

Sondaı-aq atalǵan topta Soltústik Irlandııa men Slovenııa, San-Marıno men Danııa quramalary kezdesedi.

Endi qazaqstandyq fýtbolshylar aldaǵy oıyndarynda 17 qarashada elordada San-Marınony qabyldasa, 20 qarashada syrt alańda Slovenııamen kezdesedi.

Eske salsaq, budan buryn el quramasy jeti kezdesý ótkizdi. El quramasy óz alańynda Slovenııadan – 1:2, Fınlıandııadan – 0:1, syrt alańda Danııadan 1:3 esebimen jeńilse, Danııany (3:2), San-Marınony (3:0), Soltústik Irlandııa (eki márte – 1:0, 1:0) qapy qaldyrdy.