EURO 2024: Ispanııa jalǵyz avtogolmen Italııadan basym tústi

ASTANA. KAZINFORM - Fýtboldan 2024 jylǵy Eýropa chempıonatynyń jetinshi oıyn kúnin B tobyndaǵy Ispanııa men Italııa quramalary túıindedi.

Italıandyq fýtbolshylar 2020 jyly Eýropa chempıony ataǵyn jeńip alǵan edi. Sol ataǵyn bıyl qorǵaı ala ma?

Atalǵan qurama búgin Ispanııamen kezdesti. Oıyn barysynda ıspanııalyq fýtbolshylar belsendi qımyl kórsetti.

Birinshi kezeńde negizinen Ispanııanyń shabýyly kórinis berdi. Alaıda oǵan qarsylas qurama laıyqty qarsylyq kórsetti.

Ekinshi kezeńde de olar sol qarqynnan báseńdegen joq. Oıynnyń 55-mınýtynda Italııa quramasynyń qorǵaýshysy Rıkkardo Kalaforı óziniń qaqpasyna gol jiberip aldy.

Osylaısha kezdesý taǵdyryn jalǵyz gol sheship, Ispanııa quramasy ekinshi jeńisine qol jetkizdi. Olar pleı-off satysyna bir týr buryn qol jetkizdi.

Aıta ketsek, atalǵan toptaǵy alǵashqy týrda Ispanııa Horvatııany 3:0, Italııa Albanııany 2:1 esebimen tize búktirdi.

Endi atalǵan topta úshinshi týrda 24 maýsymda Ispanııa men Albanııa, Italııa men Horvatııa sheberlik baıqasady.

Eske salsaq, 19 maýsymda C tobynda Anglııa men Danııa, Slovenııa men Serbııa 1:1 esebine qanaǵat bildirdi.