EURO 2024: Grýzııa óz tarıhynda alǵash ret Portýgalııany jeńdi
ASTANA. KAZINFORM — Fýtboldan 2024 jylǵy Eýropa chempıonatynda toptyq kezeń aıaqtaldy. Toptyq kezeńdegi sońǵy eki oıyn F tobyndaǵy quramalar arasynda ótti.
Alǵashqy eki oıynda bir de bir upaıdan shashaý shyǵarmaǵan Portýgalııa fýtbolshylary úshinshi týrda Grýzııamen kezdesti.
Bıyl tuńǵysh ret qurlyqtyq dodanyń fınaldyq satysyna shyqqan grýzııalyq qurama jarysty jalǵastyrý múmkindigin úze qoıǵan joq edi.
Sondyqtan azýly qarsylasymen kezdesýde tek qana jeńis olardy pleı-off satysyna alyp shyǵatyn.
Alǵashqy mınýttan Portýgalııa qaqpasyna lap qoıǵan olar jyldam gol soǵyp ketti. Olardyń qatarynan Hvıcha Kvaratshelııa 2-mınýtta qaqpany dál kózdedi.
Al 57-mınýtta Jorj Mıkaýtadze qarsylas qaqpasyna belgilengen penaltıden múlt ketken joq.
Osylaısha Grýzııa qarsylasynan 2:0 esebimen basym túsip, pleı-off satysyna joldama aldy.
Olar Portýgalııany óz tarıhynda alǵash ret jeńdi.
Taǵy bir kezdesýde Chehııa men Túrkııa sheberlik baıqasty. Oıynnyń 20-mınýtynda chehııalyq Antonın Barak qyzyl qaǵaz alyp, alańnan qýylyp ketti.
Túrkııalyq Hakan Chalhanoglý 51-mınýtta Chehııa qaqpasynan sańylaý taýyp, óz quramasyn alǵa shyǵardy.
Chehııalyq fýtbolshylar da qarap qalǵan joq. Oıynnyń 66-mınýtynda olardyń qatarynan Tomash Soýchek tarazy basyn teńestirip ketti.
Túrkııalyq Djenk Tosýn 94-mınýtta qorytyndy esepti belgiledi.
Kezdesýde Túrkııa Chehııany 2:1 esebimen jeńip ketti.
Qurlyqtyq dodanyń pleı-off satysynda Ispanııa men Grýzııa, Germanııa men Danııa, Portýgalııa men Slovenııa, Frantsııa men Belgııa, Rýmynııa men Nıderland, Avstrııa men Túrkııa, Anglııa men Slovakııa, Shveıtsarııa men Italııa sheberlik baıqasady.
Jarystyń atalǵan satysyndaǵy oıyndar 29 maýsym men 2 shilde aralyǵynda ótkiziledi.
Eske salsaq, 26 maýsymda Rýmynııa men Slovakııa 1:1, Ýkraına men Belgııa 0:0 esebine qanaǵat bildirgen edi.
