Eýro-2024: Belgııa quramasy alǵash ret Slovakııadan jeńildi

ASTANA. KAZINFORM - Fýtboldan 2024 jylǵy Eýropa chempıonatynyń tórtinshi oıyn kúninde E tobynda Belgııa quramasy Slovakııadan jeńilip qaldy. 

Álem fýtbolynda Belgııa quramasy joǵary baǵalanady. Quramynda kóptegen tanymal oıynshylar bar. Olardyń barlyǵy derlik bedeldi klýbtar namysyn qorǵaıdy.

Sondyqtan jankúıerler Belgııa alǵashqy týrda Slovakııany esh qıyndyqsyz jeńedi dep joramal jasaǵan edi. Alaıda kezdesý barysynda slovakııalyq fýtbolshylar saýatty oıyn kórsete bildi.

Kezdesý bastalǵanda belgııalyq qurama qarsylasyn tyqsyryp baqty. Shabýylshy Romelý Lýkaký gol soǵatyn múmkindikti múlt jiberip aldy.

Esesine olar 7-mınýtta óz qaqpasyna gol jiberip aldy. Slovakııalyq Ivan Shrants 7-mınýtta kózdegen nysanadan múlt ketken joq.

Oılamaǵan jerden gol jiberip alǵan Belgııa quramasy alǵa qaraı umtyldy. Oǵan qarsylasy laıyqty qarsylyq kórsetti.

Ekinshi kezeńde olar tizgindi óz qolynda ustaýǵa tyrysty. Degenmen slovakııalyq qorǵaýshylar oǵan toıtarys berip jatty.

Oıyn barysynda Belgııa quramasy eki márte gol soqqan edi. Tóreshiler olardyń erejege saı soǵylmaýyna baılanysty esepke alǵan joq.

Kezdesýde Belgııa Slovakııaǵa 0:1 esebimen jol berip, atalǵan qarsylasynan alǵash ret jeńildi.

Eki qurama buǵan deıin 3 márte sheberlik baıqasty. Olardyń 2-eýinde teń nátıje tirkelse, 1-eýinde Belgııanyń mereıi ústem boldy. Slovakııa ázirge atalǵan qarsylasyn jeńe almaı kele jatqan edi.

Aıta ketsek, budan buryn E tobynda Rýmynııa Ýkraınany 3:0 esebimen tize búktirdi.

Sondaı-aq, endi saǵat 23:55-te D tobyndaǵy Avstrııa men Frantsııa kezdesýi ótedi.