Euro-2024: Bas júlde kimge buıyrady
ASTANA. KAZINFORM – Búgin jankúıerler asyǵa kútken fýtboldan XVII Eýropa chempıonaty jalaýyn kóteredi. Alpys jyldan astam tarıhy tasqa basylǵan bedeldi básekede bıyl 24 qurama aıǵa jýyq ýaqyt boıy bas júlde úshin talasady. Kil myqtynyń arasynan kimniń mereıi ústem bolaryn jasyl alań tórindegi tartysty oıyndar sheshedi. Fýtbolshylardyń sheberlik deńgeıi, quramalardyń qazirgi daıyndyǵy qalaı? Janúıerler arasynda chempıondyq ataqqa qaısysy basty úmitker degen saýal bar. Osy oraıda fýtbol taqyrybynda jıi qalam terbep júrgen jýrnalısterdiń oı-pikirin bilgen edik.
Nurǵazy Sasaev:
– Árbir qurama qurlyqtyq dodaǵa qatysatyn quramyn jarııalady. Qaı-qaısysy da ala dopty urshyqsha úıire biletin úzdikter. Kezdesý taǵdyryn sheship kete alatyn áleýeti zor myqtylar az emes. Árıne, olardyń arasynda juldyzy jarqyraǵan sheber fýtbolshylary kóp tájirıbeli quramalarǵa kóbirek senim artamyz. Oıynshylar quramyna qarap, aldyn-ala boljam aıtýǵa negiz bar. Árıne, men basty favorıt retinde Frantsııa quramasyn ataımyn. Bilikti maman óz eliniń ulttyq qurama tizginin uzaq jyldan beri ustap keledi. Shákirtteriniń barlyǵy - bedeldi klýbtarda kóshbasshy oıynshylar. Odan keıingi kezekte Anglııa, Germanııa, Ispanııa, Portýgalııa, Italııa, Nıderland,Ýkraına quramalary bar.
Ermuhamed Máýlen:
– Bıyl qurlyqtyq dodanyń qyzyǵy az bolmaıdy degen oıdamyn. Jas ekenine qaramastan jasyl alańda jasyndaı jarqyldap júrgen jampozdar kóp. Barlyq quramanyń bas júldege qol sozsaq degen arman-maqsaty bar. Árıne, bul oraıda Kılıan Mbappe, Antýan Grızmann, Ýsman Dembele sekildi kóptegen juldyzdy jınap alǵan Frantsııany aldymen atap ketpesek ábestik bolar. Odan keıingi kezekte Ispanııa quramasyn ataımyn. Qazir olardyń sapynda órimdeı Lamın ıAmal esimdi saıypqyran bar. Sondaı-aq Anglııa men Belgııany da bul tizimnen syzyp tastaı almaımyz. Bálkim, Ýkraına quramasy da sensatsııa jasap qalatyn shyǵar. Óıtkeni, qazir shabýylshy Artem Dovbık Ispanııanyń «Jırona» klýbyn órge súırep júrgen jaıy bar. Oǵan qosa Roman ıAremchýk, Mıhaıl Mýdrık, Aleksandr Zınchenko, Andreı Lýnın syndy fýtbolshylar Eýropanyń bedeldi klýbtarynyń quramynda dop teýip júr.
Ázız Orazbaev:
– Fýtbol áleminiń sýperkompıýteri atanǵan Opta degen statıstıkalyq kompanııa bıylǵy Eýronyń basty favorıti retinde Anglııa quramasyn atapty. Rasymen de, «arystandar» bıyl aıbatty. Kezindegi Stıven Djerrard, Frenk Lempard, Devıd Bekhemnen keıin bul quramada talanttardyń toǵysqan tusy bıylǵa kelip tur. Qorǵanysta Djon Stoýnz, Djo Gomes syndy myqtylar bar. Ortada Deklan Raıs, Djýd Bellıngem, Fıl Fodenniń oıqastaıtynyna senimdimin. Alǵy shepte Garrı Keınge senim artady. Onyń ústine, bas bapkeri Garrı Saýtgeıt te bul komandany sonaý 2016 jyldan beri pisirip keledi. Al fınalda bularǵa doda qojaıyndary Germanııa qarsylas bolýy múmkin. Úzdik úshtikke Frantsııa men kez kelgen tosynsyı bolar bir komanda iligýi múmkin. Óz basym, Túrkııa, Ýkraına quramalaryna jáne «Real» klýbynyń oıynshylary bar ujymdarǵa jankúıermin.
Ádilbek Jaqanov:
– Álem fýtbolynyń jaryq juldyzy Krıshtıaný Ronaldý jasy qyryqqa jaqyndap qalsa da áli de sheberligimen eldi tánti etip keledi. Árdaıym babyn joǵaltpaı kele jatqan jampoz qurlyqtyq dodadan quralaqan qaıtpaýdy qalaıdy. Óz mansabynda ol Álem jáne Eýropa chempıonatynda jeńis tuǵyrynan kórine alǵan joq. Bálkim, sol olqylyqtyń ornyn bıyl toltyra ala ma? Portýgalııa quramasy sapynda odan ózge de tájirıbeli oıynshylar sany kóp. Sondyqtan men atalǵan quramany bedeldi básekede bas júldeden negizgi úmitker dep baǵalaımyn. Al Frantsııa – osal tusy joq qurama. Bir Mbappeniń ózi ne turady? Bul quramada barlyq pozıtsııada kil myqtylar bar. Kez kelgeni oıyn taǵdyryn sheshýge qaýqarly.
