EURO - 2024: Avstrııa Polshadan basym tústi
ASTANA. KAZINFORM - Fýtboldan 2024 jylǵy Eýropa chempıonatynyń segizinshi oıyn kúni, 21 maýsymda D tobyndaǵy Avstrııa Polshadan basym tústi.
Alǵashqy týrda eki qurama da jeńilistiń aşy dámin tatty. Aldymen Polsha Nıderlandqa 1:2 esebimen jeńilse, odan keıin Avstrııa Frantsııaǵa 0:1 esebimen ese jiberdi.
Búgingi oıyn barysynda avstrııalyq fýtbolshylar jeńiske jetýge kúsh saldy. Oıynnyń 9-mınýtynda Gernot Traýner esep ashty.
Oǵan polshalyq qurama jyldam jaýap qaıyrýǵa tyrysty. Bul maqsatyna 30-mınýtta jete aldy. Olardyń qatarynan Kshıshtof Pentek qaqpany dál kózdep, tarazy basyn teńestirgen edi.
Al ekinshi kezeńde avstrııalyq fýtbolshylar taǵy eki gol soǵyp, kezdesý taǵdyryn sheshti. Olardyń qatarynan Krıstof Baýmgartner 66-mınýtta basymdyqty arttyrsa, Marko Arnaýtovıch 78-mınýtta penaltıden múlt ketken joq.
Osylaısha Avstrııa qarsylasyn 3:1 esebimen jeńip, týrnır kestesindegi jaǵdaıyn birshama jaqsartyp aldy.
Bul toptaǵy Nıderland jáne Frantsııa kezdesýi 00.00-ge belgilengen.
Eske salsaq, budan buryn E tobynda Ýkraına quramasy Slovakııany 2:1 esebimen jeńdi.
