Eýro-2020: San-Marıno quramasynyń áleýeti qandaı
QYZYLORDA. QazAqparat - Búgin fýtboldan 2020 jylǵy Eýropa birinshiligi irikteý kezeńindegi I tobynda tórtinshi týr ótkiziledi. Qazaqstan quramasy óz alańynda San-Marınony qabyldaıdy, dep habarlaıdy QazAqparat tilshisi.
Bizdiń jigitter buǵan deıin óz tobynda úsh oıyn ótkizdi. Aldymen óz alańynda Shotlandııa quramasyn 3:0 esebimen tize búktirdi. Odan keıin Reseıden 0:4 esebimen jeńilip qaldy. Al 8 maýsymda syrt alańda Belgııaǵa 0:3 esebimen jol berdi. Al San-Marıno barlyq kezdesýde qarsylastarynan utyldy. Atap aıtqanda, Kıprge 0:5, Shotlandııaǵa 0:2, Reseıge 0:9 esebimen ese jiberdi.
San-Marıno - álemdegi eń shaǵyn memlekettiń biri. Bul el dúnıe júzinde jer kólemi jóninen 190-oryndy ıelenedi. Halyq sany - 33 myńnan astam. Atalmysh memleket Italııanyń ortasynda oryn tepken.
San-Marıno fýtbol federatsııasy 1931 jyly qurylǵan. Degenmen, FIFA jáne UEFA quramyna 1988 jyly qabyldandy. Olar - álemdegi eń álsiz quramanyń biri. FIFA-nyń sońǵy reıtınginde 211 quramanyń arasynda eń sońǵy orynda tur. Osynyń ózi olardyń áleýeti qandaı ekenin aıqyndaı túsedi.
San-Marıno quramasy búginge deıin álem chempıonaty irikteý kezeńinde barlyǵy 66 oıyn ótkizdi. Nátıjesinde eki márte teń túsip, qalǵanynyń barlyǵynda qarsylasyna ese jiberdi. Alǵash ret 1993 jyldyń 10 naýryzynda óz alańynda Túrkııamen 0:0, odan keıin 2001 jyldyń 25 sáýirinde syrt alańda Latvııamen 1:1 esebimen teń tústi. Qarsylastar qaqpasyna 11 márte gol soǵyp, óz qaqpasyna 310 dop jiberip aldy. Atalmysh týrnırde olardyń eń iri jeńilisi retinde 2001 jyldyń 28 aqpanynda syrt alańdaǵy Belgııamen ótken oıyndaǵy 1:10 esebi tirkelip otyr.
San-Marıno quramasy Eýropa birinshiligi irikteý kezeńinde barlyǵy 69 oıyn ótkizdi. Olar bir márte óz alańynda 2014 jyldyń 15 qarashasynda Estonııamen 0:0 esebimen teń túsip, qalǵanynyń barlyǵynda jeńildi. Bul týrnırdegi eń iri jeńilisinde 2006 jyldyń 6 qyrkúıeginde Germanııadan 0:13 esebimen jol bergen.
San-Marıno quramasy sapyndaǵy fýtbolshylardyń barlyǵy derlik óz eliniń birinshiliginde synǵa túsedi. Sońǵy jyldarda atalmysh memlekette «La Fıorıta» jáne «Tre Penne» komandalary joǵary jetistikterge qol sozyp keledi. Qazirge deıingi úzdik oıynshylar qatarynda Andı Selvany aıtýǵa bolady. Ol kezinde Italııanyń «Ellas Verona» komandasynyń namysyn qorǵasa, qazir óz eliniń «La Fıorıta» klýbynda oıyn kórsetedi. Sondaı-aq, qazirgi kúnderi Italııada oınaıtyn qaqpashy Elıa Benedettını («Novara»), Lýka Tozı. Marchello Mýlaronı men Fabıo Tomassını (úsheýi de «Petrakýtadan»), Alsessandro Polınýchchı men Matteo Vıtaıolı ( ekeýi de «Tropıkal Korıanodan»), Lorentso Lýnadeı («Rıchchone»). Fılıppo Berardı («Monopolı»), Nıkola Nannı («Krotone») bar. Degenmen, olardyń barlyǵy Italııanyń tómengi lıgalarynda oıyn kórsetedi.
Aıta keterligi, Qazaqstan quramasy búginge deıin Eýropa birinshiligi irikteý kezeńinde 37 oıyn ótkizdi. Onyń 5-i bizdiń paıdamyzǵa sheshilse, 7-i teń nátıjemen aıaqtaldy. Qalǵan 25 kezdesýde qarsylastarǵa ese jiberip qoıdy.
Qazaqstan men San-Marıno quramalary buǵan deıin birde-bir márte kezdesip kórgen joq. Sondyqtan, búgingi oıyn eki qurama arasyndaǵy tarıhı match retinde tirkeledi.
Atalmysh kezdesý Nur-Sultan ýaqytymen 19.50-de bastalady. Oıyn QazSport telearnasynan tikeleı efırde kórsetiledi.
