Eýro-2020: Kıpr quramasyn jeńe alamyz ba
NUR-SULTAN. QazAqparat - Búgin fýtboldan Qazaqstan quramasy 2020 jylǵy Eýropa birinshiligi irikteý satysyndaǵy besinshi oıynyn syrt alańda Kıprmen ótkizedi, dep habarlaıdy QazAqparat tilshisi.
Esterińizge sala ketelik, bizdiń qurama I tobynda synǵa túsedi. Qarsylastary - Belgııa, Reseı, Shotlandııa, San-Marıno jáne Kıpr quramalary. Búginge deıin bizdiń fýtbolshylar tórt oıyn ótkizdi. Aldymen 21 naýryzda óz alańynda Shotlandııany 3:0 esebimen oısyrata jeńse, odan keıin 24 naýryzda Reseıge 0:4 esebimen jol berdi . Al 8 maýsymda syrt alańda Belgııadan 0:3 esebimen jeńilse , 11 maýsymda elordada San-Marınony 4:0 esebimen tize búktirdi . Al Kıpr San-Marınodan 5:0 esebimen basym túsip, odan keıin Belgııadan 0:2, Shotlandııadan 1:2, Reseıden 0:1 esebimen jeńildi.
Kıpr quramasy búgingi kúnge deıin álem jáne Eýropa birinshiliginiń fınaldyq satysynda baq synap kórgen joq. Kıpr fýtbolshylary alǵashqy resmı oıynyn 1958 jylǵy álem birinshiligine irikteý kezeńinde Izraıl quramasyna qarsy ótkizý tıis bolatyn. Degenmen bul oıyn ótkizilgen joq. Kıpr quramasy vıza máselesine baılanysty Izraılge bara almady. Olarǵa tehnıkalyq jeńilis jazyldy. Uzaq jyldar boıy kıprlik fýtbolshylar álem birinshiliginiń irikteý kezeńinde jeńiske jete almaı keldi. 1973 jyldyń 14 aqpanynda Soltústik Irlandııa quramasyn tize búktirip, osylaısha dúbirli doda barysyndaǵy alǵashqy jeńisin toılady.
Eýropa birinshiligi irikteý kezeńindegi alǵashqy resmı oıynyn 1966 jyldyń 3 jeltoqsanynda óz alańynda Rýmynııaǵa qarsy ótkizgen bolatyn. Degenmen bul kezdesýde qarsylasymen laıyqty oıyn kórsete alǵan joq. Rýmynııa quramasynan 1:5 esebimen jeńilip qaldy. Jeńilis serııasy tórt oıynǵa jalǵasty. 1968 jyldyń 17 aqpanynda Shveıtsarııa quramasynan 2:1 esebimen basym tústi.
1994 jylǵy álem birinshiligine irikteý kezeńinde Kıpr quramasy táp-táýir nátıjege qol jetkizdi. Bul joly olar upaı qorjynyn molaıtty. Sol kezeńdegi myqtylar qatarynda sanalatyn Chehoslovakııamen teń túsip, óz jankúıerlerin qýanta tústi. Al 1998 jylǵy álem birinshiligine irikteý satysynda óz alańynda azýly Ispanııany 3:2 esebimen súrindirdi. Sondaı-aq, 2004 jylǵy álem birinshiligine irikteý satysynda olardyń ekinshi oryn alýyna múmkindigi týyndaǵan edi. Degenmen ózderiniń kózdegen maqsatyna jete alǵan joq.
Qazaqstan men Kıpr quramalary buǵan deıin eki márte joldastyq kezdesý ótkizdi. Alǵashqysynda 2004 jyldyń 21 aqpanynda Kıpr halyqaralyq týrnırinde jolyǵyp, bizdiń qurama alań ıelerinen 1:2 esebimen jeńilip qaldy. Odan keıin 2017 jyldyń 22 naýryzynda sol elde joldastyq kezdesýde sheberlik baıqasty. Bul kezdesýde 1:3 esebimen qarsylasymyzǵa ese jibergen edik. Endeshe, búgin Qazaqstan quramasy jeńiske jetken jaǵdaıda ol tarıhı jeńis retinde baǵalanady. Sondaı-aq, eki qurama 10 qazanda elordada taǵy bir oıyn ótkizedi.
Eki qurama deńgeıi qatarlas. Týrnır kestesindegi jaǵdaıymyzda jaqsartamyz dese, bizdiń jigitter búgingi kezdesýde jaqsy oıyn órnegin kórsetýi tıis.
Búgingi kezdesý Nur-Sultan ýaqytymen 22.00-de bastalady. Oıyn Qazsport telearnasynan tikeleı efırde kórsetiledi.
Sondaı-aq, búgin bizdiń topta Shotlandııa men Reseı, San-Marıno men Belgııa quramalary kezdesedi.
