Eýro-2020: Qazaqstan San-Marınony jeńdi

San-Marıno álemdegi álsiz quramanyń biri sanalady. Sondyqtan qazaqstandyq fýtbolshylardyń jeńiske jetý múmkindigi joǵary edi. Oıyn jankúıer kútkendegideı boldy. Aıta ketelik, Qazaqstan quramasy I tobynda synǵa túsip jatyr.

Esterińizge sala ketsek, eki qurama bıylǵy 11 maýsymda elordada bir márte kezdesip úlgerdi.

Bul kezdesýde qazaqstandyq fýtbolshylar qarsylasyn 4:0 esebimen tize búktirgen bolatyn.

Qazaqstandyq fýtbolshylar jyldam gol soǵyp úlgerdi. Bul goldy 6-mınýtta Baktııar Zaınýtdınov oryndady. Al 22-mınýtta Ǵafýrjan Súıimbaev esepti ulǵaıta tústi. Budan keıin de qazaqstandyq qurama oıyn tizginin óz qolynan shyǵarǵan joq. Nátıjesinde birinshi kezeń aıaqtalǵanǵa deıin olar taǵy bir márte qarsylastar qaqpasyn dál kózdedi. Bul gol shabýylshy Alekseı Şetkınniń enshisine jazyldy. Birinshi kezeńde qazaqstandyq fýtbolshylar alań ıelerin 3:0 esebimen tize búktirdi.

Ekinshi kezeńde de Qazaqstan quramasy oıyn tizginin qolynan shyǵarǵan joq. Degenmen alań ıeleri kóp jaǵdaıda saýatty qorǵana bildi. Qazaqstandyq fýtbolshylar alańnyń qos qanatynan da shabýyl uıymdastyrdy. Esesine 76-mınýtta San-Marıno sapynan Fılıppo Berardı qazaqstandyq qaqpadan sańylaý tapty. Osylaısha olar 2017 jyldyń 4 qyrkúıeginen keıin gol soǵyp otyr. Ol joly syrt alańda Ázerbaıjannan 1:5 esebimen jeńilip qaldy. Jalpy alǵanda, san-marınolyq fýtbolshylar álem jáne Eýropa chempıonatynyń irikteý satysynda búgingi kúnge deıin bar-joǵy 18 ǵana gol soqqan.

Búgingi kezdesýde Qazaqstan quramasy qarsylasyn 3:1 esebimen tize búktirdi.

Sondaı-aq, búgin I tobynda syrt alańda Shotlandııany 2:1, Belgııa Reseıdi 4:1 esebimen jeńdi. Bul týrdan keıin 27 upaımen Belgııa kósh bastap tursa, odan keıingi oryndaǵy Reseıdiń 21 upaıy bar. Al Shotlandııa 12, Kıpr men Qazaqstan 10 upaı enshilese, San-Marıno áli birde-bir upaı enshilegen joq.

Endi sońǵy týrda Belgııa men Kıpr, San-Marıno men Reseı, Shotlandııa men Qazaqstan quramalary kezdesedi.

Foto: kff.kz