Eýro-2020: Qazaqstan Reseı quramasymen kezdesedi
NUR-SULTAN. QazAqparat - Búgin fýtboldan Eýropa birinshiligi irikteý satysyndaǵy kezekti oıynynda Qazaqstan quramasy Reseımen kezdesedi, dep habarlaıdy QazAqparat tilshisi.
Esterińizge sala ketelik, bizdiń qurama I tobynda synǵa túsedi. Qarsylastary - Belgııa, Reseı, Shotlandııa, San-Marıno jáne Kıpr quramalary. Búgingi kezdesý Reseıdiń Kalınıngrad qalasynda ótkiziledi. Bul qos quramanyń da irikteý satysyndaǵy altynshy oıyny. Bes oıynnan keıin Reseı 12 upaımen ekinshi orynda kele jatsa, Qazaqstan 7 upaımen úzdik úshtikti túıindep tur.
Ótken týrda quramamyz syrt alańda Kıprmen 1:1 esebimen teń oınady. Oǵan deıin qazaqstandyq fýtbolshylar tórt oıyn ótkizdi. Aldymen 21 naýryzda óz alańynda Shotlandııany 3:0 esebimen oısyrata jeńse, odan keıin 24 naýryzda Reseıge 0:4 esebimen jol berdi. Al 8 maýsymda syrt alańda Belgııadan 0:3 esebimen jeńilse, 11 maýsymda elordada San-Marınony 4:0 esebimen tize búktirdi. Al Reseı de syrt alańda Shotlandııany 2:1 esebimen tize búktirdi. Sondyqtan olar búgin sol jeńisti eseleı túsýdi qalaıtyny anyq. Qazaqstan quramasy da jankúıer qaýymdy jelpinterlik sheberligin kórsetýge tyrysady.
Reseı quramasy qaıbir jyldary óz oıyn órnegin kórsete almaı quldyrap ketkeni belgili. Nátıjesinde FIFA reıtınginde 50-orynǵa deıin túsip ketti. Jergilikti maman Stanıslav Cherchesov qurama tizginin ustaǵannan beri orys fýtbolshylary táp-táýir nátıjege qol jetkizdi. Byltyr óz jerinde ótken álem birinshiliginde toptyq kezeńnen súrinbeı ótti. Shırek fınalǵa deıin jetti. Bıyl jalaýyn kótergen Eýropa birinshiligi irikteý kezeńinde de bes oıynnyń tórteýinde basym tústi. Sondyqtan jarystyń fınaldyq satysyna joldama alýǵa jaqyn tur dep aıtýǵa negiz bar.
Reseı bapkerleri men mamandary búgingi kezdesýde alań ıeleri jeńiske jetedi degen oıyn bildirip qoıdy. Árıne, ony jasyl alań tórinde ótken oıyn barysy kórsetetin bolady. Qos qurama buǵan deıin eki márte joldastyq jáne bir márte resmı kezdesý ótkizdi. Alǵashqy oıyn 2008 jyldyń 23 mamyrynda boldy. Bul joly Reseı sapynan Pavel Pogrebnıak, Vladımır Bystrov, Konstantın Zyrıanov, Dınııar Bılıaletdınov, Dmıtrıı Torbınskıı jáne Dmıtrıı Sychev gol soqty. Qazir atalmysh quramadan ıÝrıı Jırkov qana bar. Kelesi kezdesý 2015 jyldyń 31 mamyrynda oınaldy. Reseı astanasy - Máskeý qalasynda bolǵan kezdesýde esep ashylǵan joq. Bıylǵy 24 naýryzda Eýropa birinshiligi irikteý kezeńinde eki qurama Nur-Sultan qalasynda kezdesý ótkizdi. Bul oıynda Reseı quramasy 4:0 esebimen jeńiske jetti.
Aıta keterligi, buǵan deıingi úsh kezdesýde qazaqstandyq fýtbolshylar qarsylastar qaqpasyna birde-bir gol soǵa alǵan joq. Búgin sol olqylyqtyń ornyn toltyra alamyz ba? Ony oıyn barysy kórsetedi.
Kezdesý elorda ýaqytymen 00.45-te bastalady. Oıyn Oıyn Qazsport telearnasynan tikeleı efırde kórsetiledi.
Sondaı-aq, búgin I tobynda Shotlandııa men Belgııa, San-Marıno men Kıpr quramalary kezdesedi.
