Eýro-2020: Qazaqstan quramasynyń qarsylastary qalaı oınady
NUR-SULTAN. QazAqparat - Búgin fýtboldan 2020 jylǵy Eýropa birinshiligi irikteý kezeńiniń I tobynyń tórtinshi týr oıynyndaǵy barlyq kezdesý máresine jetti, dep habarlaıdy QazAqparat tilshisi.
Esterińizge sala ketelik, búgin Qazaqstan quramasy óz alańynda San-Marınony tize búktirdi.
Sondaı-aq, Reseı óz alańynda Kıpr quramasyn qabyldaan edi. Bul oıynda esep 38-mınýtta Alekseı Ionov ashty. Budan keıin gol soǵylǵan joq. Reseı Kıprdi 1:0 esebimen jeńdi.
Al top basynda kele jatqan Belgııa quramasy Shotlandııany 3:0 esebimen jeńdi. Belgııa sapynan Romelo Lýkaký 45 jáne 57-mınýttarda qarsylastaryn qapy qaldyrdy. Al 92-mınýtta Kevın De Breıne qanjyǵasyn maılap, qorytyndy esepti belgiledi.
Tórt týrdan keıin birde-bir upaıdy shashaý shyǵarmaǵan Belgııa quramasy kósh bastap keledi. Odan keıingi orynda 9 upaımen Reseı quramasy tur. Búgingi jeńisinen keıin bizdiń fýtbolshylar 6 upaımen úshinshi orynǵa kóterildi. Dál osyndaı upaı jınaǵan Shotlandııa tórtinshi orynǵa turaqtady. Besinshi oryndaǵy Kıprdiń 3 upaıy bolsa, San-Marıno ázirge birde-bir upaıǵa qol jetkizgen joq.
Endi kelesi týr oıyndary 6 qyrkúıekte ótkiziledi. Bul kúni San-Marıno men Belgııa, Shotlandııa men Reseı, Kıpr men Qazaqstan quramalary kezdesedi.
Foto: kff.kz
