Eýro-2020: Qazaqstan quramasy Belgııaǵa qandaı qaýqar kórsetedi
NUR-SULTAN. QazAqparat - Búgin fýtboldan 2020 jylǵy Eýropa birinshiligi irikteý kezeńinde I tobynda synǵa túsip jatqan Qazaqstan men Belgııa quramalary kezdesedi. QazAqparat tilshisi osyǵan oraı qos quramanyń buǵan deıingi kezdesýleri, qarsylas komandanyń jetken jetistikteri jaıynda aqparat usynady.
Esterińizge sala ketelik, bizdiń qurama buǵan deıin eki kezdesý ótkizdi. Aldymen óz alańynda Shotlandııany 3:0 esebimen jeńdi. Odan keıin Reseıge 0:4 esebimen jol berip qoıdy. Ázirge Belgııa quramasy birde-bir upaıdy shashaý shyǵarǵan joq. Alǵashqy kezdesýde óz alańynda Reseıdi 3:1 esebimen tize búktirse, odan keıin syrt alańda Kıprden 2:0 esebimen basym tústi. Belgııa quramasy atalmysh topta jeke-dara kósh bastap tur.
Búgingi qarsylasymyz jaıynda jankúıerler jaqsy biledi. Qurama sapynda álemge áıgili juldyzdar az emes. Olardyń qatarynda Tıbo Kýrtýa, Eden Azar, Aksel Vıtsel, Romelý Lýkaký, Dıvok Orıgı syndy myqtylar bar. Sondaı-aq, FIFA-nyń sońǵy reıtınginde atalmysh qurama birinshi orynda tur. Osynyń ózi qarsylasymyzdyń áleýetin aıǵaqtaı túsedi. Degenmen, olar búgingi kúnge deıin álem jáne qurlyq birinshilikterinde top jaryp kórgen joq. Eýropa birinshiliginde 1972 jyly 3-oryn úshin saıysta Vengrııadan 2:1 esebimen basym túsip, qola júldeni qanaǵat tutty. Al 1980 jyly fınalda Germanııaǵa 1:2 esebimen jeńilip, «kúmis» aldy. Álem birinshiliginde júldegerler qatarynan 2018 jyly ǵana kórindi. Reseıde ótken dúbirli dodada Anglııany 2:0 esebimen jeńip, álem birinshiliginde úshinshi oryn aldy.
Qazaqstan quramasy úshin Belgııa óte jaqsy tanys. Buǵan deıin eki qurama tórt márte kezdesti. Onyń ekeýinde teń nátıje tirkelse, ekeýinde qarsylastarymyz úsh upaıdy oljalady. Aıta keterligi, qos qurama buǵan deıin tek Eýropa birinshiligi irikteý kezeńderinde jolyqqan. Aldymen 2006 jyldyń 16 tamyzynda bizdiń jigitter Belgııada atalmysh qarsylasymen 0:0 esebimen teń oınady. Al 2007 jyldyń 12 qyrkúıeginde bizdiń alańda ótken kezdesýde qos qurama 2:2 esebine qanaǵat bildirdi. Sol joly A tobyndaǵy segiz qurama arasynda Belgııa - 5, Qazaqstan 6 orynǵa ıe boldy. Aıta keteıik, bizdiń quramaǵa 2006-2008 jyldarda gollandııalyq maman Arno Paıpers jetekshilik etti.
Budan keıin eki qurama 2012 jylǵy Eýropa birinshiligi irikteý kezeńinde taǵy da A tobynda jolyqty. 2010 jyldyń 8 qazanynda Nur-Sultan qalasynda ótken oıynda Belgııa quramasy 2:0 esebimen basym tússe, 2011 jyldyń 8 maýsymynda olar óz alańynda 4:1 esebimen jeńip ketti. Bul jyldarda nemis Bernd Shtork pen cheh Mıroslav Beranek bas bapker qyzmetin atqardy.
Búgingi kezdesý aldynda bizdiń qurama sapynan birqatar negizgi oıynshylar jaraqat alyp qaldy. Olardyń qatarynda ıÝrıı Logvınenko, Ǵafýrjan Súıimbaev, Dmıtrıı Shomko bar.
Atalmysh kezdesý 9 maýsym kúni Nur-Sultan ýaqytymen 00.45-te bastalady. Kezdesý «QazSport» telearnasynan kórsetiledi.
