Eýro-2020: Qazaqstan quramasy Belgııadan úshinshi márte jeńildi
NUR-SULTAN. QazAqparat - Fýtboldan 2020 jylǵy Eýropa birinshiligi irikteý kezeńinde I tobynda synǵa túsip jatqan Qazaqstan quramasy búgin Belgııadan iri eseppen jeńilip qaldy, dep habarlaıdy QazAqparat tilshisi.
Bizdiń quramanyń bas bapkeri Mıhal Bılek alǵashqy mınýttan tómendegi oıynshylarǵa senim bildirdi. Qaqpany Dmıtrıı Nepogodovqa senip tapsyrsa, qorǵanysta Abzal Beısebekov, Temirlan Erlanov, Sergeı Malyı, jáne Aleksandr Marochkın - Islambek Qýat oınaıdy. Al jartylaı qorǵanysta ıÝrıı Pertsýh, Maksım Fedın, Georgıı Jýkov, ıAn Vorogovskıı jasyl alańǵa shyqsa, shabýyl shebinde Toqtar Janǵylyshbaı boldy.
Al Belgııa quramasynyń bas bapkeri Roberto Martınes alǵashqy mınýttan qaqpaǵa Tıbo Kýrtýany shyǵarsa, qorǵanysta Vensan Kompanı, ıAn Vertongen, Tobı Alderveıreld syndy jigitterge senim bildirdi. Al jartylaı qorǵanysta Aksel Vıtsel, Kevın de Brıýıne, Torgan Azar, Tımotı Kastan oınasa, shabýylda Eden Azar, Drıs Mertens, Romelý Lýkaký boı kórsetti.
Eske sala ketelik, Belgııa álem fýtbolynda úzdikter qatarynda sanalady. FIFA-nyń sońǵy reıtınginde atalmysh qurama birinshi orynda tur. Sondyqtan bizder úshin búgingi kezdesý ońaıǵa soqpaıtyny anyq edi. Rasynda da solaı bolyp shyqty.
Belgııa quramasy alǵashqy mınýttan oıyn tizginin qolǵa aldy. Bizdiń qaqpanyń qos qaptalynan jıi boı kórsetti. Olardyń gol soǵatyn birneshe múmkindigi boldy. Dese de alǵashqy gol 11-mınýtta soǵyldy. Drıs Mertens tepken dop bizdiń qorǵaýshynyń aıaǵyna tıip baǵytyn ózgertip jiberdi. Nátıjesinde qaqpashymyz Dmıtrıı Nepogodov onyń jolyna bóget bola alǵan joq.
Belgııa oıynshylary budan keıin de shabýyl shebin kúsheıte tústi. Álem fýtbolynyń jaryq juldyzy Eden Azar áriptesi Tımotı Kastange ádemi pas shyǵaryp berdi. Tımotı Kastan tepken dop bizdiń qaqpadan tabyldy. Birinshi kezeńde olar negizinen shabýyl shebinde júrdi. Degenmen tablodaǵy esep ózgergen joq.
Ekinshi kezeńde Mıhal Bılek oıynǵa tájirıbeli oıynshy Baýyrjan Islamhandy qosty. Ol Toqtar Jańǵylyshbaıdy almastyrdy. Budan keıin bizdiń fýtbolshylar birshama shıraq qımyl kórsetti. Alaıda kezekti shabýyldyń birinde Romelo Lýkaký esepti ústemeleı tústi. Esep 3:0. Mıhal Bılek taǵy da eki oıynshyny almastyrdy. «Aqtóbe» shabýylshysy Abat Aıymbetov 66-mınýtta Maksım Fedınniń, 70-mınýtta Ashat Taǵybergen Islambek Qýattyń ornyna alańǵa shyqty. Budan keıin bizdiń jigitter birshama shabýyl uıymdastyrdy. Degenmen olardyń eshbiri golǵa aınala qoıǵan joq. Osylaısha Belgııa 3:0 esebimen jeńiske jetti.
Aıta ketelik, budan buryn eki qurama tórt márte kezdesti. Eki oıyn teń aıaqtalsa, ekeýinde belgııalyqtar basym tústi. Búgingi kezdesýden keıin Belgııa bizdiń quramany úshinshi márte tize búktirdi.
Búgin I tobynda Reseı San-Marınony 9:0, Shotlandııa Kıprdi 2:1 esebimen tize búktirdi.
Kelesi týr oıyndary 11 maýsymda ótkiziledi. Bul kúni Qazaqstan óz alańynda San-Marınony qabyldasa, Belgııa men Shotlandııa, Reseı men Kıpr sheberlik baıqasady.
