Eýro-2020: Fınaldyq kezeńge joldama alǵan 20 qurama belgili boldy
NUR-SULTAN. QazAqparat – 19 qarasha kúni fýtboldan 2020 jylǵy Eýropa chempıonatyna irikteý týry máresine jetti. Jarystyń fınaldyq kezeńine joldama alǵan 20 qurama belgili boldy, dep habarlaıdy QazAqparat tilshisi.
Olardyń qatarynda Anglııa, Chehııa, Ýkraına, Portýgalııa, Germanııa, Gollandııa, Shveıtsarııa, Danııa, Horvatııa, Ýels, Ispanııa, Shvetsııa, Polsha, Avstrııa, Frantsııa, Túrkııa, Belgııa, Reseı, Italııa, Fınlıandııa quramalary bar.
Atalmysh quramalar tórt sebetke bólindi. Alǵashqysynda Italııa, Anglııa, Belgııa, Ispanııa, Ýkraına, Germanııa, ekinshisinde Frantsııa, Polsha, Shveıtsarııa, Horvatııa, Reseı, Gollandııa, úshinshisinde Portýgalııa, Túrkııa, Danııa, Avstrııa, Shvetsııa, Chehııa, tórtinshisinde Fınlıandııa, Ýels jáne Ulttar lıgasy pleı-off satysynda ozyp shyqqan 4 qurama ornalasqan. Jerebe tartý rásimi 30 qarashada Rýmynııa astanasy - Býharest qalasynda ótkiziledi.
Eýropa chempıonatynyń fınaldyq satysy 2020 jyldyń 12 maýsymy - 12 shildesi aralyǵynda ótkiziledi. Oǵan barlyǵy 24 qurama qatysýǵa múmkindik alady. Atalmysh týrnırdiń irikteý satysynda barlyǵy 10 toptan alǵashqy eki orynǵa ıe bolǵan quramalar jarystyń fınalyna birden ótedi. Al qalǵan tórt qurama 2020 jylǵy 29-31 naýryzda Ulttar lıgasy pleı-off satysynda ozyp shyqqan quramalar arasynda anyqtalady.
Aıta keterligi, Eýropa chempıonatynyń fınaldyq kezeńi káriqurlyqtyń Ázerbaıjan, Anglııa, Vengrııa, Germanııa, Danııa, Irlandııa, Ispanııa, Italııa, Gollandııa, Reseı, Rýmynııa jáne Shotlandııa memleketterindegi 12 qalada ótkiziledi. Bul Eýropa chempıonatynyń alǵash ótkizilgenine 60 jyl tolý mereıtoıyna oraı uıymdastyrylyp otyr.
Eske salaıyq, keshe Qazaqstan quramasy kvalıfıkatsııanyń sońǵy týrynda syrt alańda Shotlandııaǵa 1:3 esebimen jol berdi.
