«Eýro-2018» dodasyna daıyndalatyn Qazaqstan fýtzalshylary
ASTANA. QazAqparat - Fýtzaldan 2018 jylǵy Eýropa chempıonatynyń irikteý dodasynda el namysyn qorǵaýǵa daıyndalatyn oıynshylardyń keńeıtilgen tizimi jarııalandy.
Fýtzaldan Qazaqstan quramasynyń bas bapkeri, Brazılııa mamany Joze Alesıo Da Sılva Eýropa chempıonatynyń elektik dodasyna daıyndalatyn fýtzalshylar tizimin jarııalady. Qazaqstan fýtzal qaýymdastyǵy jarııalaǵan keńeıtilgen tizimge 16 fýtzalshy enipti. Ázirshe ekeýi artyq. Jattyǵý jıynynan keıin sońǵy tizim túzilip, oǵan 14 oıynshy ǵana tirkeledi.
Esterińizge sala keteıik, «Eýro-2018» elektik dodasynyń 6-toptaǵy irikteý oıyndary 8-11 sáýir aralyǵynda Almatyda ótedi. Bizdiń fýtzalshylarymyzdyń qarsylastary - Chehııa, Makedonııa jáne Danııa quramalary.
Oıyndar kúntizbesimen myna silteme arqyly tanysýǵa bolady.
Osy topta birinshi oryn alǵan komanda tikeleı 2018 jylǵy Eýropa chempıonatynyń fınaldyq kezeńine shyǵady.
Qazaqstan quramasynyń keńeıtilgen tizimi:
qaqpashylar - Igıta («Qaırat»), Grıgorıı Shamro («Aqtóbe»);
oıynshylar - Dinmuhambet Súleımenov, Serik Jamanqulov, Shyńǵys Esenamanov, Mıhaıl Pershın, Dýglas, (bári de - «Qaırat»), Leo («Sportıng», Portýgalııa), Dáýren Tursaǵulov, Aleksandr Dovgan, Arnold Knaýb, Birjan Orazov (bári de - «Jetisý»), Qaırat Imanálın, Albert Aqbalyqov (ekeýi de - «Aqtóbe»), Ersultan Saǵyndykov, Anton Ryndın (ekeýi de - «Aıat»).
Derekkóz: Astana fýtbol federatsııasy
