EÝRO-2016: Jerar Pıke Ispanııaǵa úsh upaı syılady
ASTANA. QazAqparat - Frantsııada Fýtboldan ótip jatqan Eýropa chempıonatynda Ispanııa quramasy Chexııany tize búktirdi.
Match 1:0 esebimen ıspandyqtardyń jeńisimen aıaqtaldy.
Match boıy Ispanııa fýtbolshylarynyń basymdyǵy edáýir bolǵanymen esepti tek 87-mınýtta asha aldy. Oıyndaǵy jalǵyz goldyń avtory - qorǵaýshy Jerar Pıke.
Aıta keteıik, fýtboldan Eýropa chempıonaty Frantsııada ótýde. Birinshiliktiń aıasy bıyldan bastap keńeıip, qurlyqtyq dodada 16 qurama emes, 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.
Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi.
Barlyq matchtar «Qazaqstan» men «Qazsport» telearnalarynda tikeleı efırde kórsetiledi.
