EÝRO-2016: Shveıtsarııa quramasy Rýmynııamen bolǵan oıynda jeńilisten aman qaldy
ASTANA. QazAqparat - Fýtboldan Eýropa chempıonatynyń toptyq kezeńinde Shveıtsarııa men Rýmynııa teń tústi.
Búgin Parıjde «Park de Prens» stadıonynda ótken match 1:1 esebimen aıaqtaldy.
Alǵashqy gol 18-mınýtta penaltıden soǵyldy. Gol avtory - Bogdan Stanký.
Shveıtsarııalyqtar esepti birden teńestirip ketýge múmkindik aldy, alaıda Fabıan Sherdiń tepken dobyn qaqpashy Chıprıan Teterýshaný tosyp aldy. Keıin rýmyndyqtar sapynan Aleksandrý Krıpchý da qaýipti shabýyl avtory atandy. Onyń izin ala Gabrıel Torje de qaqyrata dop tepken edi, biraq ol qaqpa mańdaıshasynan keıin serpildi.
Jalpy birinshi taım negizinen shveıtsarııalyqtardyń nátıjesiz shabýyldarymen aıaqtaldy.
Ekinshi taımda Rýmynııa fýtbolshylary belsendilik tanytty. Al shveıtsarııalyq komanda esepti teńestirýdiń amaldaryn jasap álek boldy. Bul is olarǵa nátıje ákeldi. 57-mınýtta Admır Mexmedı buryshtamadan berilgen pasty tıimdi paıdalanyp, sol aıaǵymen alys buryshqa dopty «súńgitip» jiberdi. Esep - 1:1. Match sońyna deıin ózara shabýyldar oryn aldy. Biraq esep qazynyń ysqyryǵyna deıin ózgergen joq.
Osylaısha, «A» tobyndaǵy Rýmynııa óziniń alǵashqy upaıyn enshiledi. Al Shveıtsarııa quramasynda 4 upaımen kósh bastap tur, degenmen bir oıyn kem ótkizgen Frantsııada ázirshe 3 upaı bar. Birde bir upaı enshilemegen Albanııa komandasy sońǵy orynǵa jaıǵasyp otyr.
Aıta keteıik, fýtboldan Eýropa chempıonaty Frantsııada ótýde. Birinshiliktiń aıasy bıyldan bastap keńeıip, qurlyqtyq dodada 16 qurama emes, 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.
Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi.
Barlyq matchtar «Qazaqstan» men «Qazsport» telearnalarynda tikeleı efırde kórsetiledi.
