Eýro-2016: Reseı Slovakııadan jeńilip qaldy
ASTANA. QazAqparat - Reseıdiń fýtbol quramasy Eýropa chempıonaty matchynda Slovakııa komandasynan 1:2 esebimen jeńilip qaldy, dep habarlaıdy RIA Novostı.
Kezdesý Frantsııanyń Lıll qalasyndaǵy "Pol Morýa" stadıonynda ótti.
Oıyn bastalysymen dopty Reseı quramasy óz baqylaýlarynda ustap otyrdy. Degenmen qaqpaǵa qaýipti shabýyl jasaıtyndaı úlken qaýqar kórsete almady. Alǵashqy goldy kezdesýdiń 32-mınýtynda Slovakııa sapynan Vladımır Vaıs saldy. Reseılikter bul golǵa qarymta gol salýǵa sonshalyqty asyǵystyq tanytpady. Sol sylbyr qımyly úshin slovaktar orystardy taǵy bir márte jazalady.
Ekinshi goldyń avtory 45-mınýtta Marek Gamshık atandy. Ekinshi taımda da oıyn sylbyr ótti. Tek oıyn sońynda reseılikter shabýylda belsendilik tanyta bastady. Oıynǵa jańadan shyqqan Glýshakov kezdesýdiń 80-mınýtynda esepti 2:1-ge jetkizdi. Osy goldan soń shabyt alǵan Reseı quramasy ústi-ústine shabýyl jasaýǵa tyrysty. Alaıda kúsh sarqylǵandyqtan, qarsylas komandanyń qaqpasyna dop engizý muń boldy. Qorytyndy esep - 2:1 slovaktardyń paıdasyna sheshildi.
Osylaısha toptyq kezeńniń qorytyndy týry aldynda reseılik quramanyń enshisinde 1 ǵana upaı bar. Al slovaktarda 3 upaı. Erteń Anglııamen oınaıtyn Ýels komandasynda da 3 upaı bar.
Aıta keteıik, fýtboldan Eýropa chempıonaty Frantsııada ótýde. Birinshiliktiń aıasy bıyldan bastap keńeıip, qurlyqtyq dodada 16 qurama emes, 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.
Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi. Barlyq matchtar «Qazaqstan» men "Qazsport" telearnalarynda tikeleı efırde kórsetiledi.
Evro-2016-nyń kelesi kezeńine ár toptan eki myqty komanda shyǵady. Sondaı-aq úshinshi oryn alǵandar qatarynan 4 komanda joldama alady.
