EÝRO-2016: Qurlyqtyq birinshiliktiń alǵashqy matchynda Frantsııa Rýmynııany tize búktirdi
ASTANA. QazAqparat - Fýtboldan Eýropa chempıonatynyń alǵashqy matchynda Frantsııa quramasy Rýmynııa komandasyn 2:1 esebimen jeńdi.
Frantsýzdar sapynan alǵashqy goldy oıynnyń 57-mınýtynda Olıve Jırý saldy. Kóp uzamaı rýmyndardyń sapynan 64-mınýtta Stanký penaltıden esep teńestirgen bolatyn. Bul esep oıynnyń sońǵy mınýttaryna deıin ustalyp turdy. Degenmen Dımıtrı Paıe kezdesýdiń 89-mınýtynda Frantsııa quramasyna jeńis golyn syılady.
Aıta keteıik, búgin, Frantsııada fýtboldan Eýropa chempıonaty bastaldy.
Birinshiliktiń aıasy bıyldan bastap keńeıip, qurlyqtyq dodada alǵash ret 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.
Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi.
Barlyq matchtar «Qazaqstan» men "Qazsport" telearnalarynda tikeleı efırde kórsetiledi.
