EÝRO-2016: Ispanııa Túrkııa quramasyn oısyrata jeńdi
ASTANA. QazAqparat - Eýropa chempıonatynyń toptyq kezeńinde Ispanııa men Túrkııa quramalary kezdesti. Frantsııanyń Nıtsa qalasynda ótken match 3:0 esebimen aıaqtaldy.
Kezdesýdiń basym bóligi ıspandyqtardyń belsendiligimen ótti. "Qyzyl soıqandar" Eýropada dopty ıelik etý boıynsha úzdik komanda ekenin búgin de dáleldedi. Ispanııa quramasy Túrkııaǵa esh múmkindik bergen joq. Alańnyń barlyq pozıtsııalarynda basym baqylaýdy júrgizip otyrdy. Túrkııalyqtarǵa dop bermegen ıspandyqtar birinshi taımnyń ózinde eki gol salyp, jankúıerlerine úlken qýanysh syılady. Oıynnyń 34-mınýtynda Nonıto bergen pasty utymdy paıdalanǵan Alvaro Morata alǵashqy gol avtory atansa, úsh mınýttan soń Nonıtonyń ózi esepti 2:0-ge jetkizdi. Ekinshi taımda túrkııalyqtar qarsylastaryn qyspaqqa almaq boldy, alaıda qarymta shabýylǵa tap bolyp, Alvaro Morata 48-mınýtta úshinshi goldy salyp ketti. Osylaısha, Morata Eýro-2016 týrnırinde dýbl avtory atanǵan alǵashqy fýtbolshy, al Ispanııa úsh gol salǵan birinshi qurama bolyp otyr.
Osy jeńisinen keıin Ispanııa pleı-off kezeńine shyǵyp otyr.
Aıta keteıik, fýtboldan Eýropa chempıonaty Frantsııada ótýde. Birinshiliktiń aıasy bıyldan bastap keńeıip, qurlyqtyq dodada 16 qurama emes, 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.
Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi.
Barlyq matchtar «Qazaqstan» men "Qazsport" telearnalarynda tikeleı efırde kórsetiledi.
