EÝRO-2016: Islandııalyqtar Qazaqstan quramasynyń qaqpasyna jaýapsyz 3 gol saldy
ASTANA. QazAqparat - Fýtboldan Qazaqstan quramasy Eýro-2016 chempıonatynyń irikteý synyndaǵy kezekti matchyn Astanada ótkizdi, dep jazady alaman.kz.
Matchtyń birinshi taımynda Qazaqstan qarsylastar qaqpasyna tórt soqqy, Islandııa segiz soqqy jasap úlgergen. Ókinishke qaraı, bizdiń jigitterdiń soqqysy nátıje bergen joq. Al qarsylastarymyz eki márte Sıdelnıkov qorǵaǵan qaqpadan sańylaý tapty.
20-mınýtta 36 jastaǵy «Barselona» men «Chelsıde» oınaǵan Eıdýr Gýdıonsen qorǵaýshylardyń qateligin paıdalanyp, Sıdelnıkovke jaqyndaı kele oń qaptalǵa shirene tepken. Bizdiń qaqpashy Gýdıonsen tepken doptyń baǵytyn anyqtaǵan, biraq úlgermedi.
32-mınýtta Bırkır Bıarnason komandalasy tastaǵan aıyp dobyn sátti paıdalanyp, esepti eselep ketti.
55-mınýtta Krasnojan Azat Nurǵalıevtiń ornyna Ulan Qonysbaevty shyǵaryp, taktıkalyq ózgeris engizýdi oılaǵan. Qazaqstan esepti qysqartýǵa baryn salǵan. 62-mınýtta Baýyrjan Islamhannyń shyǵarǵan aıyp dobyn Renat Abdýllın qarsylastar qaqpasyna baspen baǵyttaǵan. Alaıda Islandııany qaqpa baǵanasy qutqaryp qaldy.
64-mınýtta Mark Gýrmannyń ornyna Ermek Qýantaev shyqty. Qýantaev oıynǵa shyǵa sala eskertý alyp, «erekshelendi». Match kezinde Qazaqstan bir gol salýǵa tyrysqanymen nátıje bolmady. Oıyn sońynda tóreshi qosqan úsh mınýtta ıslandııalyq Bırkır Bıarnason taǵy da qorǵaýshylardyń óreskel qateligin paıdalanyp, matchtaǵy ekinshi golyn salyp ketti. Qorytyndy esep - 0:3.
Islandııa irikteýdegi besinshi matchyn ótkizip, tórtinshi jeńisine qol jetkizdi. Olar 12 upaımen birinshi orynǵa shyqty. Al Qazaqstan tórtinshi ret jeńildi. Krasnojan baptaıtyn komandada bir upaı bar.
Matchty shamamen 13000 adam tamashalady.
