EÝRO-2016: Chexııamen synasqan Horvatııa quramasy qolda turǵan jeńisti ustaı almady

Frantsııanyń Sent-Eten qalasynda «Joffrýa-Gıshar» stadıonynda ótken match 2:2 esebimen aıaqtaldy. Kezdesýdiń sońǵy mınýttaryna deıin Horvatııa 2:0 esebimen basym kele jatqan. Degenmen, chexııalyqtar oıyn aıaqtalar tusta esepti teńestire aldy.
Horvatııalyq fýtbolshylar match boıy basymdyqqa ıe boldy. Lýka Modrıch, Ivan Perıshıch pen Ivan Rakıtıch bastaǵa úshtik Petr Chextiń qaqpasyna úzdiksiz shabýyldaýmen boldy. Chexııalyqtar bolsa, qarymta shabýyldarǵa ıek artty, alaıda birde-bir ret qaqpaǵa soqqy jasaı almady.

Birinshi taım ortasynda (37-mınýt) Ivan Perıshıch xorvattardy alǵa shyǵardy.
Ekinshi taımda da xorvatııalyq qurama belsendi oıyn órnegin kórsetti. Oıynnyń 58-mınýtynda qaqpashymen betpe-bet shyqqan Rakıtıch esepti 2:0-ge jetkizdi.

Osymen, chexterdiń jeńilisi aıqyn bolyp kóringen. Alaıda chex bapkeri alańǵa Mılan Shkodany shyǵarady. Ol óz kezeginde komandaǵa jańa serpin ákelip, kezdesýdiń 78-mınýtynda xorvattardyń qaqpasyna bir dop sala aldy. Osy kezde trıbýnada xorvatııalyq jankúıerler tóbeles shyǵaryp, alańǵa otshashý laqtyryp, oǵash qylyq tanyta bastady. Qazylar oıyndy birneshe mınýttarǵa toqtatýǵa májbúr boldy.
Oıynnyń kelesi bóligi chexııalyqtardyń janushyra jasaǵan shabýyldarymen este qaldy. Bul óz jemisin berdi de. Kezdesý aıaqtalar tusta, 93-mınýtta xorvatııalyq qorǵaýshy óziniń aıyp alańynda qolmen oınap, tóreshi 11 metrlik aıyp dobyn belgileıdi. Bul mindetti oıynǵa jańadan shyqqan Tomash Netsıd sátti oryndady. Esep - 2:2.
Aıta keteıik, fýtboldan Eýropa chempıonaty Frantsııada ótýde. Birinshiliktiń aıasy bıyldan bastap keńeıip, qurlyqtyq dodada 16 qurama emes, 24 komanda oınaıtyn bolady. Fýtbolsúıer qaýym «kári qurlyqtyń» eń myqty quramalarynyń qatysýymen 51 match tamashalaı alady.
Eýropa birinshiligi Frantsııanyń on qalasynda 10 maýsym men 10 shilde kúnderi aralyǵynda ótedi.
Barlyq matchtar «Qazaqstan» men «Qazsport» telearnalarynda tikeleı efırde kórsetiledi.