«Eýro-2012»: Qazaqstan quramasy Ázirbaıjandy 2:1 esebimen jeńdi
ASTANA. 3 maýsym. QazAqparat /Marlan Jıembaı/ - Fýtboldan Qazaqstan ulttyq quramasy «Eýro-2012» chempıonatynyń irikteý týrnıri aıasyndaǵy alǵashqy jeńisine qol jetkizdi.
Bizdiń komanda búgin «Astana Arena» stadıonynda Ázirbaıjan quramasyn qabyldap, 2:1 esebimen jeńiske jetti. Jerlesterimizdiń sapynan eki goldy da oıynnyń ekinshi kezeńinde, atap aıtqanda 57-shi jáne 69-shy mınýttarynda quramaǵa jańadan alynǵan Qostanaıdyń «Tobyl» komandasynyń shabýylshysy - Sergeı Grıdın soqty. Osylaısha, 3 upaıdy ıelengen Qazaqstan quramasy upaı sany boıynsha Ázirbaıjanmen teńesti.
Aıta keteıik, bul cheh mamany Mıroslav Beranek tizginin ustaǵannan keıingi bizdiń komandanyń «Eýro-2012» chempıonatynyń irikteý týrnıri aıasyndaǵy ekinshi, al jalpy toptyq týrnırdegi altynshy oıyny boldy. Jerlesterimiz buǵan deıin ótkizgen bes matchtyń barlyǵynda da jeńilip qalǵan bolatyn. Atap aıtar bolsaq, Qazaqstan quramasy óz alańynda Túrkııaǵa 0:3, Belgııaǵa 0:2, Germanııaǵa 0:3 esebimen ese jiberse, syrt alańda Avstrııadan 0:2. Germanııadan 0:4 esebimen utylyp qalǵan edi.
Aıta keteıik, "Eýro-2012" chempıonatynyń irikteý týrnıri aıasynda Qazaqstan quramasy Germanııa, Túrkııa, Avstrııa, Belgııa jáne Ázirbaıjan quramalarymen birge «A» tobynda oınaýda.
