«Eýro-2012»: Búgin Qazaqstan quramasy Germanııamen oınaıdy
ASTANA. Qazannyń 12-si. QazAqparat /Marlan Jıembaı/ - Búgin fýtboldan Qazaqstan ulttyq quramasy «Eýro-2012» chempıonatynyń irikteý týrnıri kezekti oıynyn ótkizedi. Bizdiń komanda «Astana-Arena» stadıonynda bıyl jazda Ońtústik Afrıka Respýblıkasynda ótken Álem chempıonatynyń qola júldegeri - Germanııa quramasyn qabyldaıdy.
Bul Qazaqstan quramasynyń irikteý týrnırindegi tórtinshi matchy. Jerlesterimiz buǵan deıin úsh kezdesý ótkizip, sonyń barlyǵynda jeńilip qaldy. Qazaqstan quramasy birinshi oıynynda qyrkúıektiń 3-i kúni elordada Túrkııany qabyldap, 0:3 esebimen utylyp qalsa, sodan keıin qyrkúıektiń 6-synda syrt alańda 0:2 esebimen Avstrııaǵa ese jiberdi. Al, qazannyń 8-inde bolǵan úshinshi matchta óz alańynda Belgııaǵa 0:2 esebimen utyldy. Sóıtip, úsh oıynda birde-bir upaı enshilemegen bizdiń komanda ózi synǵa túsetin «A» tobynda Ázirbaıjan quramasymen sońǵy orynda keledi. Al, Germanııa quramasy bolsa «A» tobynda» kósh basynda tur. Nemis fýtbolshylary syrt alańda Belgııany 1:0, óz alańynda Ázirbaıjandy 6:1 jáne Túrkııany 3:0 esebimen utty. FIFA-nyń sońǵy jarııalaǵan reıtıngi boıynsha, Germanııa quramasy 3-inshi, al Qazaqstan quramasy 126-ynshy orynda tur.
Búgin sondaı-aq bizdiń topta Ázirbaıjan-Túrkııa jáne Belgııa-Avstrııa quramalary ózara sheberlik baıqasady. Aıta keteıik, 2012 jylǵy Eýropa chempıonatynyń irikteý týrnıri aıasynda bizdiń komanda Germanııa, Túrkııa, Belgııa, Avstrııa jáne Ázirbaıjan komandalarymen birge «A» tobynda synǵa túsýde.
