«Eýro-2012»: Búgin Qazaqstan quramasy Belgııamen oınaıdy
ASTANA. Qazannyń 8-i. QazAqparat /Marlan Jıembaı/ - Búgin fýtboldan Qazaqstan ulttyq quramasy «Eýro-2012» chempıonatynyń irikteý týrnıri aıasyndaǵy kezekti oıynyn elordadaǵy «Astana-Arena» stadıonynda Belgııamen ótkizedi. Bizdiń komandanyń bul irikteý týrnırindegi úshinshi matchy.
Jerlesterimiz birinshi kezdesýin qyrkúıektiń 3-i kúni elordada Túrkııa quramasymen ótkizip, 0:3 esebimen utylyp qalǵan bolatyn. Odan keıin qyrkúıektiń 6-synda syrt alańda 0:2 esebimen Avstrııaǵa ese jiberdi. FIFA-nyń sońǵy jarııalaǵan reıtıngi boıynsha, Belgııa quramasy 62-inshi, al Qazaqstan quramasy 126-ynshy orynda tur. Búgingi matchta bizdiń komanda jankúıerler kóńilinen shyýǵa tyryspaq. Keshe Astanada baspasóz máslıhatyn ótkizgen Qazaqstan quramasynyń bas jattyqtyrýshysy, nemis mamany Bernd Shtork: ««Biz osynda kelgenimizge qýanyshtymyz. Biz aldaǵy matchtyń favorıtteri emes ekenimizdi bilemiz. Avstrııa quramasy - nemisterdiń býndeslıgasynda óner kórsetetin óte jas oıynshylardan quralǵan myqty komanda. Degenmen biz tek qorǵanysta jatyp almaı, shabýylǵa shyǵyp, tamasha oıyn kórsetýge tyrysamyz», - dedi .
Búgin sondaı-aq bizdiń topta Germanııa- Túrkııa jáne Avstrııa-Ázerbaıjan quramalary ózara sheberlik baıqasady. Aıta keteıik, 2012 jylǵy Eýropa chempıonatynyń irikteý týrnıri aıasynda bizdiń komanda bıyl Ońtústik Afrıka Respýblıkasynda ótken álem chempıonatynyń qola júldegeri Germanııamen, sondaı-aq Túrkııa, Belgııa, Avstrııa jáne Ázirbaıjan komandalarymen birge «A» tobynda synǵa túsýde.
