Eýrazııanyń qaýipsizdik júıesin qaıta qaraý qajet – Nursultan Nazarbaev
«Derjavalar arasyndaǵy jahandyq qarama-qaıshylyq tehnologııalar salasyna aýysty. Qytaılyq Huawei kompanııasynyń oqıǵasy álemdik derjavalar arasyndaǵy geosaıası narazylyqtyń tehnologııa salasyna, elektronıka óndirisine eriksiz yqpal etetinin kórsetti. AQSh pen Qytaı arasyndaǵy shıelenistiń artýy álemdik joǵary tehnologııalar naryǵyn turaqsyzdandyryp, jahandyq tehnologııalyq tizbektiń buzylýyna ákep soqty», - dedi Elbasy plenarlyq otyrystyń ashylýynda.
Sonymen birge, Elbasy orasan múmkindikter men orasan syn-qater ákelýi múmkin jasandy ıntellektiniń qarqyndy damyp kele jatqanyn atap ótti. Onyń aıtýynsha, jasandy ıntellekt búginde turaqtylyqty buzý men gıbrıdtik soǵystardyń mańyzdy quralyna aınaldy.
«Besinshiden, Taıaý Shyǵystaǵy, jahandyq energetıkalyq qaýipsizdik boıynsha mańyzdy ról oınaıtyn aımaqtaǵy jaǵdaı kúrdelene tústi. Energııa tasymaldaýshylardyń 30 paıyzynyń Ormýz buǵazy arqyly ótetinin bilemiz. AQSh-tyń Iran boıynsha ıadrolyq kelisimnen shyǵýy da óńirdegi jaǵdaıdy shıelenistirip jiberdi. Bul kelisimniń ornaýyna Qazaqstan kezinde úles qosqan bolatyn. Sizder talqyǵa salǵan osyndaı úrdisterdiń barlyǵy Eýrazııadaǵy qaýipsizdik júıesin qaıta retke keltirýdi, jańa sapalyq túrin jasap shyǵarýdy qajet etedi», - dedi Nursultan Nazarbaev.
Aıta keteıik, 11-12 qarasha kúnderi «Nazarbaev Ortalyǵynda» álemniń jetekshi dıplomattary men saıasatkerleriniń jáne sarapshylarynyń basyn qosatyn «Astana klýbynyń» besinshi otyrysy ótýde. Mereıtoılyq otyrys taqyryby «Úlken Eýrazııa: jahandyq yntymaqtastyqtyń jańa qurylymy jolynda» dep atalady. Klýbtyń saraptamalyq talqylaýyna AQSh, Qytaı jáne Reseı arasyndaǵy qyrǵı-qabaqtyń ýshyǵýy, saýda protektsıonızmi men popýlıstik kóńil-kúıdiń artýy, sondaı-aq Iran men Soltústik Koreıa tóńireginde jańa shıelenisterdiń boı kórsetýi máseleleri arqaý bolmaq.
Buǵan deıin Astana Club sarapshylary Eýrazııanyń basty 10 syn-qaterin jarııalaǵan edi.
