Eýrazııanyń kólik-logıstıka haby ataný úshin júk tasymaldaýshylarǵa jaǵdaı jasalady — N. Nálibaev
ASTANA. KAZINFORM — Júk tasymaldaýshylarǵa qolaıly jaǵdaı jasaý úshin shekaradaǵy ótkizý pýnktteri jańǵyrtylyp, halyqaralyq avtodálizder boıyndaǵy servıstik ınfraqurylym damıdy. Bul týraly Premer-mınıstrdiń birinshi orynbasary Nurlybek Nálibaev baıandady.
Memleket basshysy Qazaqstan halqyna Joldaýynda elimizdi Eýrazııanyń kólik-logıstıka habyna aınaldyrý jóninde naqty maqsat qoıǵan edi.
— Biz kólik ınfraqurylymyn damytýǵa basymdyq beremiz. Qazirgi ýaqytta 37 avtomobıl ótkizý pýnktin jańǵyrtý jumystary jalǵasýda. Olardy kelesi jyldyń sońyna deıin aıaqtaımyz. Júk tasymaldaýshylarǵa qolaıly jaǵdaı jasaý úshin shekaradan bastap halyqaralyq avtodálizderdiń búkil baǵyttary boıynsha — jol boıyndaǵy ınfraqurylym damytylady, — dedi dedi Nurlybek Nálibaev Úkimette ótken baspasóz máslıhatynda.
Búginde jol boıynda 1 465 nysan jumys isteıdi. Sońǵy 3 jylda 221 nysan salyndy. Atalǵan jobalarǵa iri kompanııalar ınvestıtsııa saldy.
— Bul nysandar — sapa men jaılylyqtyń joǵary standarttaryna saı keletin janarmaı quıý stantsııalary, qonaqúıler, dúkender jáne tehnıkalyq qyzmet kórsetý stantsııalary ornalasqan jol boıyndaǵy tutas servıstik keshender, — dep tolyqtyrdy vıtse-premer.
Onyń aıtýynsha, kólik salasynda 712 mln tonna júk tasymaldandy, bul ótken jyldyń sáıkes kezeńimen salystyrǵanda 0,9%-ǵa artty. Shamamen 1,5 mlrd jolaýshy tasymaldanyp, bul kórsetkish ótken jyldyń sáıkes kezeńimen salystyrǵanda 3,4%-ǵa ósti.
Temirjol kóligimen tranzıttik júk tasymaldaý kólemi 33,8 mln tonnaǵa jetip, 15%-ǵa ulǵaıdy. Barlyq negizgi kórsetkishter boıynsha oń serpin baıqalady.
— Elimizdiń tranzıttik áleýetin odan ári damytý úshin birqatar jańa jobalar josparlandy. Tranzıttik avtomobıl joldaryn damytý aıasynda «Ortalyq — Batys», «Qaraǵandy — Jezqazǵan», «Aqtóbe — Ulǵaısyn» baǵyttarynda, Saryaǵash qalasynyń aınalma jolynda qurylys jáne rekonstrýktsııalaý jumystary bastaldy, — dedi N. Nálibaev.
Osy jyldyń tamyz aıynda Prezıdent Aral — Kaspıı magıstraliniń qurylysyna resmı túrde bastaý berdi. Joba 2028 jyldyń sońyna aıaqtalyp, el ıgiligine paıdalanýǵa beriledi. Atalǵan avtomobıl joly Transkaspıı dáliziniń áleýetin arttyryp, júkterdi jetkizý merzimin úsh kúnge deıin qysqartýǵa múmkindik beredi.
— Júk aǵynynyń ulǵaıýyn eskere otyryp, «Kókshetaý — Petropavl» ýchaskesin keńeıtýge daıyndyq jumystary júrgizilýde. Qurylys jumystaryn 2027 jyldyń birinshi jartyjyldyǵynda bastaý josparlanýda, — dedi Premer-mınıstrdiń orynbasary.
Buǵan deıin Nurlybek Nálibaev «Aýqymdy qurylys» qarajatynyń naqty qaı salalarǵa bólinetinin aıtyp berdi.
