«Eýrazııalyq» JZQ ótken 9 aıdyń qorytyndysyn jarııalady
ALMATY. Qyrkúıektiń 27-si. QazAqparat /Erbol Azanbek/ - Ótken 9 aıdyń qorytyndysy boıynsha «Eýrazııalyq jınaqtaýshy zeınetaqy qory» AQ zeınetaqy qorlary arasynda kiris jóninen kóshbasshy boldy. Bul týraly búgin Almatyda ótken baspasóz máslıhatynda qordyń basqarma tóraǵasy Tatıana Medvedeva aıtty.
Onyń aıtýynsha, aǵymdaǵy jyldyń qańtar-qyrkúıek aılarynda salymshylardyń zeınetaqy shottaryna 5 369,194 mln. teńge kóleminde ınvestıtsııalyq kiris aýdarylǵan. Bul ótken jyldyń uqsas merzimimen salystyrǵanda 71,3 paıyzǵa joǵary. 9 aıda 1 000 teńgelik zeınetaqy aktıvine qosylǵan ınvestıtsııalyq kiris kólemi 81,8 teńgeni quraǵan. Bul zeınetaqy naryǵyndaǵy ortasha zeınetaqy kirisinen 2 ese joǵary. Kórsetkish «Eýrazııalyq» JZQ-da 7,54 paıyz, naryqtaǵy ortasha kórsetkish 4,54 paıyz
«Ótken 9 aıda qordyń jalpy kirisi 418,953 mln.teńgeni qurady. Bul ótken jyldyń osy merzimine qaraǵanda 69 paıyzǵa joǵary. Bul paıdanyń basym bóligi jeke kapıtaldy ulǵaıtýǵa baǵyttaldy. Aǵymdaǵy jyldyń 1- qazanyndaǵy esep boıynsha jeke kapıtaldyń kólemi 3 179,609 mln. teńgeni qurady»,- dedi T.Medvedeva. Qordyń basqarma tóraǵasynyń aıtýynsha, qor ótken 9 aıda zeınetaqy jasyna jetken tulǵalarǵa 1,3 mıllıard teńge tólem jasaǵan.
