Eýrazııalyq úkimetaralyq keńes: Almatydaǵy kelissózder qalaı ótti
Otyrysqa sonymen qatar Reseı Federatsııasynyń Premer-Mınıstri Mıhaıl Mıshýstın, Belarýs Premer-Mınıstri Sergeı Rýmas, Moldova Premer-Mınıstri Ion Kıký, Qyrǵyzstan Premer-Mınıstri Mýhammedkalyı Abýlgazıev, Armenııa Respýblıkasynyń Premer-Mınıstri Nıkol Pashınıan jáne Eýrazııalyq ekonomıkalyq komıssııa Alqasynyń tóraǵasy Tıgran Sarkısıan qatysty.
Ádettegideı, Úkimetaralyq keńes otyrysy shaǵyn jáne keńeıtilgen quramda ótti.
Shaǵyn quramda EAEO aıasyndaǵy ózara is-qımyldyń ózekti máseleleri boıynsha pikir almasyldy. Integratsııalyq birlestikti nyǵaıtýdy damytý úshin asa mańyzdy máselelerdiń keń aýqymy qaraldy. Atap aıtqanda, EAEO-ǵa múshe memleketterdiń Odaqtyń ishki naryǵynyń jumysy aıasynda kedergilerdi joıý boıynsha jumys barysy qaraldy. Sonymen qatar Eýrazııalyq ekonomıkalyq odaq aıasynda alkogol naryǵyn retteý týraly Kelisim jobasyna qatysty jumys barysy týraly baıandama tyńdaldy.
Keńeıtilgen formattaǵy otyrys Eýrazııalyq ekonomıkalyq odaqtyń tsıfrlyq kólik dálizderi ekojúıesin qalyptastyrý máselelerine arnaldy. Otyrysqa qatysýshylar Eýrazııalyq úkimetaralyq odaqtyń keıbir sheshimderin talqylady.
Barlyǵy EAEO múshe memleketterdiń saýda-ekonomıkalyq yntymaqtastyǵyn damytýǵa baǵyttalǵan 14 másele qaraldy.
Keńes otyrysyn ashqan QR Premer-Mınıstri Asqar Mamın 2019 jyldyń EAEO damýy úshin mańyzdy ári jemisti jyl bolǵanyn atap ótti.
« Birinshiden, biz ıntegratsııalyq birlestiktiń besjyldyq mereıtoıyn atap óttik, aldaǵy besjyldyq kezeńge ıntegratsııalyq protsesterdi damytýdyń jańa kókjıekteri úshin negiz saldyq, birqatar mańyzdy qujattar qabyldandy. EAEO aǵymdaǵy jáne budan arǵy damýy boıynsha ózara tıimdi ýaǵdalastyqtarǵa qol jetkizildi. Keme qatynasy týraly Kelisimge qol qoıyldy, ortaq elektr energetıkalyq naryqty qurýdyń quqyqtyq negizi jasaldy, ortaq qarjy naryǵyn qurý Tujyrymdamasy bekitildi «, — dedi A. Mamın.
Belarýs Premer-Mınıstri Sergeı Rýmas 2020 jyly 1 qańtardan bastap EAEO organdarynda tóraǵalyqty qabyldaǵan taraptyń ókili retinde Eýrazııalyq ıntegratsııanyń odan ári júıeli damýy úshin barlyq kúsh-jigerin salýǵa nıetti.
« Eń aldymen, bizdiń nazarymyz kedergilerdi joıýǵa, EAEO naryqtaryndaǵy shekteýlerdi alyp tastaýǵa, sondaı-aq tosqaýyldardyń jańa túrleriniń paıda bolý múmkindiginiń aldyn alýǵa aýdarylatyn bolady «, — dedi Sergeı Rýmas.
Bul maqsatqa qol jetkizý quraldarynyń biri — birinshi kezekte tehnıkalyq retteý, sanıtarııalyq, veterınarııalyq jáne fıtosanıtarııalyq sharalaryn qoldaný, memlekettik satyp alýlardy júzege asyrý, sýbsıdııalar usyný tárizdi salalarda EEK-nyń ulttyq organdardan joǵarǵy quzyretterin kúsheıtý.
Armenııa Respýblıkasynyń Premer-Mınıstri Nıkol Pashınıan Belarýs aıqyndaǵan ıntegratsııanyń basymdyqty baǵyttaryna qoldaý bildirdi. Ol ortaq ekonomıkalyq keńistikti qalyptastyrýǵa bóget bolatyn qalǵan kedergilerdi joıýdyń mańyzdylyǵyn atap aıtty, tarıfterde baǵany belgileý jáne tabıǵı monopolııalar qyzmetterine qoljetimdilik salasynda kemsitilmeıtin tásilderdi qamtamasyz etýmen EAEO naryǵynda energetıkalyq jáne kólik naryǵyn qalyptastyrýǵa baǵyttalǵan kúsh-jigerdi belsendirý qajettigin naqtylady.
« Odaq organdarynyń jumysynyń tıimdiligin rattyrý jáne kólik-logıstıka ınfraqurylymyn damytý – bizdiń basty nazarymyzda bolýy tıis taǵy bir baǵyt. Armenııa Respýblıkasy ádette EAEO tsıfrlyq kún tártibin qurý jáne iske asyrý protsesterine belsene qatysady jáne olardy qoldaıdy. Tsıfrlyq kólik dálizderi ekojúıesin qalyptastyrý taýarlar men qyzmetterdi tutynýshylar men óndirýshiniń jáne satýshynyń arasyndaǵy dıstantsııalardy azaıtýǵa múmkindik beredi dep sanaımyz. Bul taýarlardy jetkizý ýaqytyn jáne onyń qozǵalysynyń ońtaıly joldary men ádisterin izdeýge jumsalatyn ýaqytty birshama azaıtady, osylaısha, bul turǵyda naryqty edáýir jetildiredi «, — dedi Armenııa Premer-Mınıstri.
Qyrǵyzstan Premer-Mınıstri Mýhammedkalyı Abýlgazıev óz kezeginde qyrǵyz tarapynyń Odaq aıasyndaǵy teńdik, senim men ózara yntymaqtastyq negizindegi is-qımyldaryna basa mán beretinin atap aıtty.
«EAEO ekonomıkalyq damýynyń ortaq maqsattary men mindetterin aıqyndaý negizinde ulttyq múddelerdi eskerý, oǵan múshe memleketterdiń ekonomıkalyq ósýiniń qosymsha kózderin qalyptastyrý prıntsıpteri jatýy tıis. Qyrǵyz Respýblıkasy Odaqty odan ári damytý maqsatynda yntymaqtastyqty tereńdetýge jáne ıntegratsııalyq protsesterdi jetildirýge umtylatyn bolady «, — dedi M. Abýlgazıev.
RF Úkimetiniń Tóraǵasy Mıhaıl Mıshýstın Reseıdiń eýrazııalyq ıntegratsııanyń dınamıkasyn onyń qyzmetiniń barlyq negizgi baǵyttary boıynsha oń baǵalap otyrǵanyn jetkizdi. Sonymen qosa, ulttyq organnan joǵary turǵyda retteý tıimdirek bolyp keledi.
« Aldymyzǵa mynadaı maqsat qoıdyq – «bestik» elderiniń ekonomıkasynyń ósimin qamtamasyz etý, sonda Odaqta ómir súretin adamdar ortaq keńistiktiń artyqshylyqtaryn sezinip, teń múmkindikterdi paıdalana alady «, — dedi Reseı Úkimetiniń basshysy.
2019 jyldyń alǵashqy úsh toqsanynda Odaqtyń jıyntyq JІÓ 1,4%-ǵa artty, aýyl sharýashylyǵynda ónerkásip ósimi 2,7% qurady.
Keńeıtilgen formattaǵy talqylaý sońynda úkimetter basshylary EAEO múshe elderdiń ıntegratsııasyn jalǵastyrýǵa baǵyttalǵan birqatar qujattarǵa qol qoıdy. Barlyǵy 10 qujatqa qol qoıyldy.
RF Úkimetiniń Tóraǵasy Mıhaıl Mıshýstın Eýrazııalyq ekonomıkalyq komıssııa (EEK) Alqasynyń tóraǵasy Tıgran Sarkısıanǵa EAEO damytý men nyǵaıtýdaǵy zor úlesi úshin birinshi dárejeli Stolypın medalin tabystady.
« EEK Alqasynyń tóraǵasy laýazymynda siz áriptesterińizben birge onyń qalyptasýynyń, Eýrazııalyq ekonomıkalyq odaqtyń qalyptasýynyń eń kúrdeli kezeńderinen óttińizder. Sizge osy aýqymdy jumysyńyz úshin alǵys aıtqym keledi jáne osy sátte paıdalana otyryp, buǵan deıin aıtyp ketkenimdeı, sizdi jýyrda atap ótken mereıtoıyńyzben quttyqtaǵym keledi. Sizge densaýlyq, zor tabys tileımin. Mundaǵy qatysýshylardyń barlyǵy bul tilegime qosylatynyna senimdimin «, — dedi M. Mıshýstın.
Belarýs Respýblıkasynyń Premer-Mınıstri S. Rýmas pen Eýrazııalyq ekonomıkalyq komıssııa Alqasynyń tóraǵasy Tıgran Sarkısıan baspasóz konferentsııasynda kelissózderdiń negizgi nátıjeleri týraly habarlady.
EAÚK kelesi otyrysy 2020 jyly 9-10 sáýirde Mınsk qalasynda ótedi.
