Eýrazııalyq odaq elderinen ákelingen kólik ıeleri qashanǵa deıin sheteldik nómirmen júre alady

ASTANA. QazAqparat – Ákimshilik polıtsııa komıtetiniń tóraǵasy Qaısar Sultanbaev Eýrazııalyq ekonomıkalyq odaq elderinde tirkeýden shyǵarylmaǵan kólik ıeleri qashanǵa deıin sheteldik nómirmen júre alatynyn aıtty, dep habarlaıdy QazAqparat tilshisi.

«Ýaqytsha esepke alynatyn kólikter boıynsha naqtylaı ketseńiz. Olar sheteldik nómirmen júre bere me?» - dep surady BAQ ókili ortalyq kommýnıkatsııalar qyzmetinde ótken brıfıngide.

Qaısar Sultanbaev ýaqytsha esepke alý sharasy bitkenge deıin mundaı kólik ıelerine polıtsııa tarapynan eshqandaı qysym bolmaıtynyn aıtady.

«17 shildege deıin biz olarǵa múmkindik berdik. Óıtkeni, bul kólikterdi ýaqytsha esepke alý úshin tirkeýge arnalǵan qosymsha servıs ázirlendi. 17 shildeden bastap bul servıs tolyqqandy jumysyn bastaıdy. Sondaı kólik ıeleri 17 shildeden bastap búkil avtotsondarǵa baryp, tirkele alady. Bir aıdyń ishinde olarǵa ázirshe eshqandaı shara qoldanbaımyz. Bul kólik ıelerine máshınelerin jáımen tirketip alýǵa múmkindik beremiz. Biraq, bul taǵy da aqyryna deıin sozyp júrip alý kerek degen sóz emes. 17 shildeden bastap arnaıy halyqqa qyzmet kórsetý ortalyqtaryna baryp, ýaqytsha esepke qoıǵyzý kerek.

Ýaqytsha esepke qoıý sharasy bitkenge deıin eshkimge tıispeımiz. Ýaqytsha esepke alý tirkeýi bitkennen keıin sharalar qabyldaı bastaımyz», - dedi komıtet tóraǵasy.