Eýrazııalyq keńistiktegi mindetterdi kúsh-jigerdi biriktirip qana sheshe alamyz – Andreı Danko
NUR-SULTAN. QazAqparat – Eýrazııalyq keńistiktegi memleketter aldyndaǵy mindetterdi kúsh-jigerdi biriktirý arqyly ǵana sheshýge bolady. Bul týraly búgin Eýrazııa elderi parlamentteri tóraǵalarynyń IV Keńesinde Slovakııa Ulttyq keńesiniń tóraǵasy Andreı Danko aıtty, dep habarlaıdy QazAqparat tilshisi.
«Parlamentaralyq keńes Eýropa men Azııa arasyndaǵy yntymaqtastyq máselelerin talqylaýǵa úlken múmkindik beredi. Osynaý geosaıası keńistiktegi damý álemdik qoǵamdastyqqa túbegeıli áserin tıgizedi. Sondyqtan da bizdiń turaqty kezdesýlerimiz barynsha mańyzdy», - dedi ol.
Onyń atap ótýinshe, Eýrazııa elderi parlamentteri tóraǵalarynyń Keńesi jyldan jylǵa bedelge ıe bolyp keledi. Oǵan Máskeýde ótken alǵashqy jıynǵa 19 elden, al búgingi Nur-Sultanda ótip jatqan forýmǵa 65 elden Parlament delegattarynyń kelýi dálel bola alady.
«Sonymen qatar Qazaqstannyń Tuńǵysh Prezıdenti Nursultan Nazarbaevtyń Eýrazııalyq ıntegratsııa bastamasyn kótergenine 25 jyl tolyp otyrǵandyǵyn eske salyp ótkim keledi. Eýrazııalyq keńistegi memleketterdiń aldynda kóptegen mindet tur. Ony biz tek kúsh-jigerimizdi biriktirý arqyly ǵana sheshe alamyz. Olardyń qatarynda ekonomıkalyq yntymaqtastyq jáne damý, óńirdegi qaýipsizdik jáne turaqtylyq syndy máseleler bar. Halyqaralyq yntymaqtastyq, onyń ishinde ulttyq parlamentterdiń yntymaqtastyǵy bul problemalardy sheshýdiń negizgi sharty sanalady», - dedi Andreı Danko.
