Eýrazııalyq qaýipsizdiktiń mańyzdy ári negizgi býyny retinde Qazaqstannyń áleýeti aıqyn baıqalady - E. Qarın
ASTANA. QazAqparat - Eýrazııalyq qaýipsizdiktiń mańyzdy ári negizgi býyny retinde Qazaqstannyń áleýeti aıqyn baıqalady. Bul týraly búgin QR Syrtqy ister mınıstrliginde QR Prezıdenti janyndaǵy Strategııalyq zertteýler ınstıtýtynyń dırektory Erlan Qarın málim etti.
«Astanadaǵy Sammıtte Prezıdent Nursultan Nazarbaevtyń Qazaqstan Eýrazııalyq qaýipsizdikti baılanystyratyn býyn bolýǵa daıyn dep aıtqany kezdeısoqtyq emes. Ýkraınalyq daǵdarysty sheshýde deldaldyq kúsh-jiger jumsaldy, ırandyq ıadrolyq problema boıynsha dıalog alańyn qurý, Sırııa boıynsha kelissózder uıymdastyrý - Eýrazııalyq qaýipsizdiktiń mańyzdy ári negizgi býyny retinde taǵy da Qazaqstannyń áleýetin kórsetip otyr», - dedi E. Qarın «Helsınkı qorytyndy aktisiniń (1975) jəne Astanadaǵy Sammıttiń (2010) mereıtoıyna arnalǵan EQYU jetistikteri men qaterleri» atty halyqaralyq konferentsııasynda. Sonymen qatar, ol Qazaqstannyń barsha álemdik saıası jáne sarapshylyq alańdarda kóterip júrgen mańyzdy taqyryptarynyń biri antııadrolyq bastamalarǵa qatysty ekenin eske salyp ótti. «BUU Bas Assambleıasy 70-shi mereıtoılyq sessııasynyń jalpy pikirtalasynda sóz sóılegen Elbasy Nursultan Nazarbaev ıadrolyq qarýdan azat álemge qol jetkizý jónindegi Jalpyǵa ortaq deklaratsııasyn qabyldaýdy usyndy. Elbasy óz sózinde Qazaqstan - ıadrolyq polıgondy japqan jáne aýqymy jaǵynan tórtinshi ıadrolyq qarý-jaraqtan bas tartqan, sondaı-aq Ortalyq Azııada ıadrosyz aımaq qurǵan tarıhtaǵy tuńǵysh el ekendigin basa atap ótti», degen E. Qarın Qazaqstan Prezıdentiniń ıadrolyq qarýsyz aımaqty álemniń ózge óńirlerinde, sonyń ishinde Taıaý Shyǵysta da qurǵan jón ekenin aıtqanyn eske saldy. «Meniń oıymsha, osy turǵydaǵy máseleler EQYU aıasyndaǵy talqylanatyn taqyryptar tizbesine enýi kerek. Túrli halyqaralyq uıymdarda kóterilgen bundaı taqyryptardy úılestirý kerek dep paıymdaımyz»,-dedi ol.
