Eýrazııalyq ekonomıkalyq komıssııa iskerlik baǵytta jumys isteýi kerek – Toqaev

BІShKEK. QazAqparat – Integratsııanyń bir máni pikir ustanymdar alýandyǵynda. QR Prezıdenti Qasym-Jomart Toqaev Eýrazııalyq ekonomıkalyq forýmynyń jalpy otyrysynda osyndaı pikir bildirdi, dep habarlaıdy QazAqparat tilshisi.

«Qazirgi tańda Eýrazııalyq ekonomıkalyq komıssııanyń aıasynda ótip jatqan keńesterdiń qorytyndysy boıynsha kedergilerdiń 80 paıyzy alynyp tastaldy. Bul jumys jalǵasady dep úmittenemiz. Jalpy ıntegratsııa degen úlken eńbekti qajet etetin úderis. Bul – múshe memleketterdiń búkil qatysýshylardyń kóńiline jaǵatyndaı negizde ymyrada bolýy. Qol jetkizilgen kelisimderge árdaıym kóńilimiz tola bermeıdi. Integratsııanyń bir máni osynda», - dedi Prezıdent.

Sondaı-aq Memleket basshysy Qazaqstannyń eýrazııalyq ıntegratsııa máselesindegi ustanymyna aıryqsha toqtaldy.

«Ortaq is úshin keıde óz múddeńdi túsire turýǵa bolady. Qazaqstan Eýrazııalyq ekonomıkalyq komıssııa iskerlik jolmen, naqty nátıjeni kózdep jumys istegenin qoldaıdy. Kez kelgen máselege óte iskerlik baǵytpen kelý kerek. Óıtkeni halqymyz máseleniń uzyn arqaýmen sheshilgenin kútip otyrmaıdy. Olar máselelerdiń dál qazir jáne keleshekte ózderi kórgisi keletindeı etip sheshilgenin qalaıdy», - dedi Qasym-Jomart Toqaev.

Aıta keteıik, Prezıdent Qasym-Jomart Toqaev Qyrǵyzstanda resmı saparmen júr.