Eýrazııalyq ekonomıkalyq qoǵamdastyqtyń Daǵdarysqa qarsy qorynyń ataýy ózgertildi - Senat
ASTANA. QazAqparat - Búgin Parlament Senatynyń jalpy otyrysynda palata depýtattary «2009 jylǵy 9 maýsymdaǵy Eýrazııalyq ekonomıkalyq qoǵamdastyqtyń Daǵdarysqa qarsy qoryn qurý týraly shartqa ózgerister engizý týraly hattamany jáne 2009 jylǵy 9 maýsymdaǵy Eýrazııalyq ekonomıkalyq qoǵamdastyqtyń Daǵdarysqa qarsy qorynyń qarajatyn basqarý týraly kelisimge ózgerister engizý týraly hattamany ratıfıkatsııalaý týraly» QR Zańyn qabyldady.
Atalǵan hattamaǵa 2015 jyly 15 maýsymda qol qoıylǵan bolatyn. Qazaqstan, Belarýs, Reseı, Qyrǵyz, Armenııa men Tájikstan sekildi alty memleket múshe bolyp tabylatyn atalǵan qor týraly hattamaǵa engiziletin ózgerister negizinen Eýrazııalyq ekonomıkalyq qoǵamdastyqtyń qyzmetin toqtatýmen baılanysty bolyp tabylady. Qarjy mınıstri Baqyt Sultanovtyń aıtýynsha, EýrAzEQ toqtatylýyna baılanysty Qordyń ataýy Eýrazııalyq turaqtandyrý jáne damý qory bolyp qaıta atalady.
Mınıstrdiń aıtýynsha, Qordyń qyzmet kezeńi ishinde Belarýs Respýblıkasy men Tájikstan Respýblıkasyna qarjylyq kredıtter berilgen. Budan bólek Qyrǵyz Respýblıkasy men Armenııada iske asyrylatyn ınvestıtsııalyq jobalar qarjylandyrylǵan.
«Budan basqa, Qordyń taratylýyna baılanysty onyń ıntegratsııalyq komıteti men Hatshylyǵynyń jumysy da toqtatylady. Osyǵan baılanysty Qor Hatshylyǵynyń fýnktsııalaryn Eýrazııalyq damý bankine, al Depozıtarıı fýnktsııalaryn Reseıdiń Syrtqy ister mınıstrligine berý júktelgen. Sonymen qatar, Hattama arqyly Qordyń taza paıdasyn kiris deńgeıi tómen qorǵa qatysýshy elderdiń áleýmettik salasyndaǵy granttyq baǵdarlamalardy óteýsiz qarjylandyrý úshin paıdalaný jónindegi norma kózdelgen», dedi mınıstr B. Sultanov.
Parlament qabyldaǵan zań Memleket basshysynyń qol qoıýyna joldanady.
