Eýrazııalyq ekonomıkalyq ıntegratsııa óziniń tolyq deńgeıine jetti - Maqsat Alpysbes
«Eýrazııalyq ıntegratsııa - N.Nazarbaevtyń tarıhı bastamasy» taqyrybynda telekópir ótti
Shara aıasynda BAQ ókilderine suhbat bergen atalǵan ýnıversıtettiń professory, tarıh ǵylymdarynyń doktory Maqsat Alpysbes 2015 jyly eýrazııalyq ıntegratsııalyq protsestiń naqty nátıjesi - Eýrazııalyq ekonomıkalyq odaqtyń qurylýy bolǵandyǵyn aıtady.
«Barlyq protsester tektonıkalyq ózgeristerdi kórsetedi. 70 jylǵa jýyq ýaqytqa sozylǵan Sovet odaǵynyń tarıhy 1991 jyly aıaqtalǵany belgili. Sol kezde SSSR quramynda bolǵan odaqtas respýblıkalardyń arasyndaǵy ekonomıkalyq, mádenı baılanystardyń tıimdi jaqtaryn saqtap qalý mańyzdy edi. Osyǵan baılanysty 1994 jyly Qazaqstannyń Tuńǵysh Prezıdenti Nursultan Nazarbaev ekonomıkalyq turǵydaǵy eýrazııalyq ıntegratsııa ıdeıasyn bastamashy boldy. Bul árıne, burynǵy SSSR keńistiginde jańadan qurylǵan TMD elderi aıasyndaǵy qarym-qatynastardyń barlyǵyn beıbit túrde birqalypty damýyna baǵyttalǵan ıdeıa edi. Sol ıdeıanyń aıasynda L.Gýmılev atyndaǵy Eýrazııa ulttyq ýnıversıteti quryldy», - dedi ol.
Ǵalymnyń atap ótýinshe, ıntegratsııalyq protsesterdiń mańyzdy máseleleriniń biri - bul ǵylymı, mádenı, áleýmettik, ekonomıkalyq baılanystardy tıimdi baǵytta damytý. Sondyqtan shyǵarmashylyq zııalylardyń, qoǵam qaıratkerleriniń yntymaqtastyǵy da mańyzdy.
«Búgingi tańda ekonomıkalyq ıntegratsııa ár tarapqa tıimdi bolýy tıis. Bul turǵyda ekonomıkalyq baılanystar eki jaqqa da tepe-teń deńgeıin saqtaýy qajet. Eýrazııalyq ıntegratsııaǵa qatysty eki túrli kózqaras bar. Bireýi eýrazııalyq ıntegratsııalyq protsesterdi tereńdetý ustanymyn jaqtaıdy. Al ekinshi taraptyń pikirinshe: «Eýrazııalyq ekonomıkalyq ıntegratsııa óziniń damý deńgeıine jetip, nátıjesin berip otyr. Endi munan keıin memleketústilik qurylymdar Qazaqstan úshin jaýap bere almaıdy». Bizdiń oıymyzsha, rasynda eýrazııalyq ekonomıkalyq ıntegratsııalyq protsester óziniń tolyq deńgeıine jetti. Endigi másele osy ekonomıkalyq odaq aıasyndaǵy 5 memleket, ıaǵnı, Qazaqstan, Qyrǵyzstan, Reseı, Armenııa jáne Belarýs bir-biriniń ulttyq táýelsizdigin qurmettep, tepe-teń qarym-qatynas jasaýy tıis», - dedi Maqsat Alpysbes.
