Eýrazııalyq damý banki qazaqstandyq jobalarǵa ınvestıtsııa kólemin ulǵaıtty

ASTANA. QazAqparat - QR Premer-Mınıstri, Eýrazııalyq damý banki (EADB) Keńesiniń tóraǵasy Álıhan Smaıylov qarjy uıymynyń basqarma tóraǵasy Nıkolaı Podgýzovpen kezdesti, dep habarlaıdy QR Úkimetiniń baspasóz qyzmeti.

2022 jylǵy EADB jumysynyń aldyn ala qorytyndylary jáne kelesi jylǵa arnalǵan jumys jospary talqylandy.

Bıyl Bank respýblıkadaǵy jobalarǵa salynǵan ınvestıtsııalardy $1,2 mlrd-qa deıin ulǵaıtty, bul ótken jyldyń jospardaǵy ındıkatorlary men kórsetkishterinen asyp tústi.

2023 jyly el ekonomıkasynyń basym salalaryna taǵy $1,1 mlrd baǵyttaý josparlanyp otyr.

Álıhan Smaıylov kooperatsııalyq jobalar sanyn arttyrýdyń mańyzdy ekenin atap ótti.

Óz kezeginde Nıkolaı Podgýzov 2026 jylǵa deıin Qazaqstanda jobalardy iske asyrýǵa keminde $3,8 mlrd kózdelgenin habarlady.

«Keler jyly qarjylandyrý kezinde logıstıkalyq ınfraqurylymdy damytýǵa, sý resýrstarymen, azyq-túlik jáne energetıkalyq qaýipsizdikpen qamtamasyz etýge, ekologııalyq kórsetkishterdi jaqsartýǵa baǵyttalǵan jobalarǵa basymdyq beriledi», — dedi EADB basshysy.

Photo: t.me/KZgovernment