Eýrazııalyq joǵary bilim kóshbasshylary forýmy jumysy bes jyldan keıin qaıta jandandy
ASTANA. KAZINFORM - Eýrazııalyq joǵary bilim kóshbasshylary forýmy (Eurasian Higher Education Leaders’ Forum, EHELF) Nazarbayev University-de ótip, oqý oryndary, halyqaralyq uıymdar, memlekettik qurylymdar, bıznes jáne sarapshylar qaýymdastyǵynyń ókilderin qaıtadan bir alańǵa jınady.
QR Ǵylym jáne joǵary bilim mınıstrligi baspasóz qyzmetiniń habarlaýynsha, 2011–2019 jyldar aralyǵynda turaqty túrde uıymdastyrylyp kelgen forým osy kezeńde joǵary bilimdi damytýǵa qatysty ózekti máselelerdi talqylaıtyn bedeldi halyqaralyq alań retinde tanylyp úlgerdi. Bes jyldyq úzilisten keıin EHELF Astanaǵa qaıta oralyp, kásibı pikir almasý, tájirıbe bólisý jáne Eýrazııa men álemniń ózge óńirlerindegi bilim berý júıelerine qatysty ortaq sheshimder izdeý dástúrin jalǵastyryp otyr.
Forýmda QR Ǵylym jáne joǵary bilim mınıstri Saıasat Nurbek EHELF-tiń jumysyn qaıta bastaýy Qazaqstannyń akademııalyq dıalogtyń óńirlik ortalyǵy retindegi ósip kele jatqan rólin aıqyn kórsetetinin atap ótti.
-Qazaqstan óziniń joǵary bilim júıesin jahandyq akademııalyq keńistikke júıeli túrde ıntegratsııalap keledi. EHELF sııaqty forýmdar bizge álemniń jetekshi ýnıversıtetterimen baǵyt-baǵdarymyzdy salystyrýǵa múmkindik beredi, – dep atap ótti mınıstr.
Bıylǵy forýmnyń taqyryby – «Biz qalyptastyratyn bolashaq» (The Future We Shape). Bul ataý ýnıversıtetterdiń ornyqty, ádiletti ári bolashaq syn-qaterlerine tótep bere alatyn qoǵam qurýdaǵy belsendi rólin aıqyndaıdy. Qatysýshylar tehnologııalyq ózgerister, ekonomıkalyq turaqsyzdyq, klımattyq syn-qaterler jáne ózgermeli geosaıası jaǵdaı máselelerine erekshe nazar aýdardy.
- Osyndaı jaǵdaıda ýnıversıtetter ózgeristerge beıimdelip qana qoımaı, bolashaqty qalyptastyrýǵa da úles qosýy tıis. Ortalyq Azııada joǵary oqý oryndary qoǵam men ekonomıkanyń damýyna jaýapty. Qurylǵan kúnnen bastap Nazarbayev University zertteý, ınnovatsııa jáne seriktestikke negizdelgen jahandyq akademııalyq ekojúıeni qalyptastyryp keledi. Sondaı-aq ýnıversıtet Qazaqstan men óńirdegi joǵary bilimdi damytýǵa degen ustanymynan aınymaı keledi, – dedi NU prezıdenti professor Vakar Ahmad.
Jumys sessııalary barysynda qatysýshylar turaqtylyq, teń múmkindikter jáne qoǵamdyq ıgilik qaǵıdattaryn ýnıversıtetterdiń damý strategııalaryna, basqarý júıelerine jáne bilim berý baǵdarlamalaryna engizý máselelerin talqylady. Sondaı-aq tsıfrlyq transformatsııanyń múmkindikteri men táýekelderi, jasandy ıntellektini bilim berý men ǵylymı zertteýlerge engizý, turaqsyzdyq pen daǵdarys jaǵdaıyndaǵy tıimdi kóshbasshylyq máseleleri keńinen qarastyryldy.
Bıylǵy forýmda joǵary bilim, ekonomıka, tehnologııa jáne memlekettik saıasat salalaryndaǵy bedeldi sarapshylar baıandama jasady. Olardyń qatarynda jahandyq ekonomıkalyq strategııa, geoekonomıka jáne geosaıasat máselelerin zertteýshi Norbert Chızmadıa, belgili malaızııalyq ǵalym, ekonometrıst ári derekterdi taldaý mamany Mahendhıran Sanggaran Naır, jasandy ıntellekt salasynyń halyqaralyq sarapshysy, University College London Bilim berý ınstıtýtynyń Jasandy ıntellekt jáne bilim berýdi synı zertteý kafedrasynyń professory Ýeın Holms, sondaı-aq ártúrli salalar men ýnıversıtetter ókilderi boldy.
- Eýrazııanyń bolashaǵyn aıqyndaıtyn jańa akademııalyq ári órkenıetti dıalog qalyptasyp jatqan Qazaqstanda «kógildir aqyq aımaqtardyń» keleshegi týraly oı bólisý men úshin úlken mártebe. Búginde álem betpe-bet kelip otyrǵan kóptegen syn-qater Ortalyq Azııada da baıqalady. Alaıda bul ózgerister jańa múmkindikter men ınnovatsııalyq damýǵa jol ashyp otyr, – dedi Norbert Chızmadıa.
Nazarbayev University jahandaný men tehnologııalyq progress jaǵdaıynda tabysty eńbek etip, jańa sheshimder usyna alatyn mamandardy daıarlaýǵa basymdyq beredi. Times Higher Education World University Rankings 2026 reıtıngine sáıkes, NU álemdegi úzdik ýnıversıtetterdiń úzdik 23%-nyń qataryna kiredi. Ýnıversıtet Kavkaz ben Ortalyq Azııa óńirinde 1-orynda jáne THE Asia University Rankings 2025 reıtınginde 150-orynda tur. Al jas ýnıversıtetter arasynda álemniń úzdik 106 joǵary oqý ornynyń qataryna kiredi.
Osyǵan deıin habarlaǵanymyzdaı Ulttyq ǵylym akademııasy jas zertteýshiler forýmyn ótkizdi.
