Eýrazııalyq qor Qazaqstan múddesindegi jobalarǵa 500 mln dollar bólýi múmkin
ASTANA. KAZINFORM – Eýrazııalyq turaqtandyrý jáne damý qory (ETDQ) Qazaqstan múddesine qyzmet etetin jobalarǵa shamamen 500 mln dollar bólýdi qarastyryp jatyr. Bul jobalar elimizde emes, óńirdegi basqa memleketterde júzege asyrylýy múmkin. Bul týraly qordyń basqarýshy dırektory ıAroslav Mandron Astanada ótken «Teńgerimdi ekonomıkalyq damýǵa bastar jol» halyqaralyq konferentsııasynyń kýlýarynda málimdedi.
ıAroslav Mandronnyń aıtýynsha, qazir qor Qazaqstanmen yntymaqtastyq strategııasyn talqylap jatyr. Qujatty jeltoqsanda ETDQ-ǵa múshe elderdiń qarjy mınıstrleriniń kezdesýinde bekitý josparlanyp otyr.
– Biz Qazaqstan múddesine qyzmet etetin jobalarǵa shamamen 500 mıllıon dollar bólgimiz keledi. Alaıda bul qarjy elimizde emes, Qyrǵyzstan, Tájikstan jáne Armenııada júzege asyrylatyn jobalarǵa jumsalmaq, – dedi ol.
Onyń túsindirýinshe, Qazaqstan men Reseı – qordyń donor elderi. Sondyqtan ETDQ Qazaqstannyń óńirdegi múddelerin basqa memleketterdegi jobalar arqyly qoldaý múmkindigin qarastyryp otyr.
Qor energetıka, sý resýrstary men kólik salalaryna basymdyq bermek. Energetıkada sý elektr stantsııalaryn damytýǵa, al sý salasynda aýyl sharýashylyǵynyń sýǵa degen suranysyn óteýge jáne halyqty taza aýyzsýmen qamtamasyz etýge erekshe kóńil bólinbek.
Mańyzdy jobalardyń biri – Qyrǵyzstandaǵy Qambar-Ata GES-1 qurylysy. Joba stantsııanyń ózimen qatar oǵan qajetti ınfraqurylymdy damytýdy da qamtıdy.
Qor Qazaqstan, Qyrǵyzstan, Ózbekstan jáne Dúnıejúzilik bank sııaqty halyqaralyq seriktestermen birge jobany qarjylandyrý tetigin ázirleýdi kózdep otyr
ıAroslav Mandron qordyń múshe elderge qoldaý kórsetý tásilin ózgertý josparyna da toqtaldy. Onyń aıtýynsha, aldaǵy birneshe jylda kúrdeli daǵdarys qaýpi bolmasa, qor yqtımal táýekelderdi erte anyqtap, olardyń aldyn alýǵa kóbirek kóńil bólmek.
– Bizdiń mindetimiz – aldaǵy jyldary týyndaýy múmkin qolaısyz faktorlardy aldyn ala boljaýǵa kómektesý jáne eldermen birlesip tıisti tetikterdi ázirleý. Bul eń aldymen ekonomıkanyń qol jetkizgen ósý qarqynyn saqtap, kórsetkishterdiń kúrt qubylýyna jol bermeý úshin qajet, – dedi ol.
Basqarýshy dırektordyń sózinshe, bul jumysta tehnıkalyq qoldaý mańyzdy ról atqarady. Atap aıtqanda, mamandardy tartý, zertteýler júrgizý jáne múshe eldermen birlesip qajetti modelder ázirleý kózdelgen.
Buǵan deıin Eýrazııalyq ekonomıkalyq komıssııa men Eýrazııalyq turaqtandyrý jáne damý qory arasynda yntymaqtastyq týraly memorandýmǵa qol qoıylǵanyn habarlaǵan edik.
