Eýrazııalyq qarjy kompanııasynyń korporatıvtik basqarý júıesinen kemshilikter tabyldy
ASTANA. KAZINFORM – Qarjy naryǵyn retteý jáne damytý agenttigi tóraǵasynyń orynbasary Oljas Qızatov «Eýrazııalyq bankke» qatysty jaǵdaıǵa túsinik berdi.
Onyń aıtýynsha, qazirgi tańda memlekettik qoldaý qarajaty bar úsh bank qana qalǵan, sonyń biri – «Eýrazııalyq bank».
– Eýrazııalyq qarjy kompanııasy (EQK) «Eýrazııalyq banktiń» banktik holdıngi. Ótken jyly atalǵan qarjy ınstıtýtynda korporatıvtik daý oryn aldy. Osyǵan baılanysty biz tekserý júrgizdik. Nátıjesinde EQK-nyń korporatıvtik basqarý júıesinde birqatar kemshilikter anyqtaldy, – dedi Oljas Qızatov.
Ol tekserý qorytyndysy boıynsha EQK-men qadaǵalaý sharalarynyń jospary bekitilgenin atap ótti.
– Qazirgi ýaqytta EQK anyqtalǵan zańnamalyq sıpattaǵy kemshilikterdi joıý baǵytynda jumys júrgizip jatyr. Bul máseleler korporatıvtik daýǵa negiz bolǵan, – dedi ol.
Sondaı-aq, agenttik ókili jaqynda qabyldanǵan sharalardyń biri retinde Aleksandr Mashkevıchtiń jubaıy men qyzdaryna iri qatysýshy mártebesi berilgenin aıtty.
– Osylaısha, aktsıonerleriniń quramy tolyq qalyptasty. Aktsıonerler arasyndaǵy barlyq kelispeýshilikter jaqyn ýaqytta retteledi dep kútemiz, – dedi Oljas Qızatov.
Buǵan deıin Prezıdent iri bankterdi talapty oryndamaı otyrǵany úshin synǵa alǵan edi.
